नवलपुर। नवलपरासी (बर्दघाट–सुस्तापूर्व)स्थित आन्तरिक राजस्व कार्यालयले चालु आर्थिक वर्षको सात महिनामा रु १२ अर्ब ३० करोड राजस्व सङ्कलन गरेको छ । गत साउनदेखि माघ मसान्तसम्म रु १२ अर्ब ६१ करोड राजस्व सङ्कलन गर्ने लक्ष्य लिइएकामा ३१ करोड रुपैयाँ कम राजस्व सङ्कलन भएको उक्त कार्यालयले जनाएको हो ।

सबैभन्दा बढी राजस्व अन्तःशुल्क शीर्षकमा रु ११ अर्ब ७५ करोड ७२ लाख सङ्कलन भएको छ । जस्मा १२ अर्ब ५५ करोड ६ लाख राजस्व असुली गर्ने लक्ष्य लिइएको प्रमुख कर अधिकृत टेकबहादुर अर्यालले जानकारी दिए ।

आयकरमा  ३० करोड ७७ लाख ९७ हजार रुपैयाँ, मूल्य अभिवृद्धि कर (भ्याट)मा रु १७ करोड २७ लाख ९० हजार रुपैयाँ, ब्याजमा तीन करोड १४ लाख २० हजार रुपैयाँ, स्वास्थ्य सेवामा एक करोड ८३ लाख ७० हजार रुपैयाँ र घरबहाल करमा ८२ लाख ५२ हजार रुपैयाँ राजस्व सङ्कलन भएको उनले बताएका छन् । कार्यालयले लक्ष्यअनुसारको राजस्व असुली गर्नका लागि करदाता शिक्षालाई प्रभावकारी रुपमा अगाडि लैजाने तयारी गरिरहेको प्रमुख कर अधिकृत अर्यालले बताए ।