एजेन्सी । वेस्ट इण्डिज भ्रमणमा रहेको भारतले टी–२० सिरिजको पहिलो खेलमा जित हासिल गरेको छ। शनिबार भएको खेलमा वेस्ट इण्डिजलाई ४ विकेटले हराउँदै भारतले पहिलो जित निकालेको हो।

हिजो भएको खेल भारतका लागि पहिलो अन्तर्राष्ट्रिय खेल खेलिरहेका बलर नवदीप सैनीले उत्कृष्ट खेल देखाए। डेब्यू खेलमै उनले कुल ३ विकेट लिए।डेथ ओभरमा बलिङ गरेका सैनीले पारीको अन्तिम ओभरमा नयाँ कीर्तिमानसमेत बनाए। जुन अहिलेसम्म टी–२० अन्तर्राष्ट्रियमा कुनै पनि भारतीय बलरले बनाउन सकेका थिएनन्।

यसरी सैनी टि-२० खेलको अन्तिम ओभर मेडन फाल्दै विकेट लिने पहिलो भारतीय खेलाडी बने। अन्तर्राष्ट्रिय विश्व क्रिकेटमा यस्तो उनीबाहेक ३ खेलाडीले मात्र गरेका छन्। यो सूचिमा न्युजिल्याण्डका जीतन पटेल, पाकिस्तानका मोहम्मद आमिर र सिंगापुरका जनक प्रकाशमात्र रहेका छन्।

यस्तै नवदीप सैनी डेब्यू खेलमा यस्तो गर्ने पहिलो खेलाडी भएका छन्। आजसम्म कुनै पनि खेलाडीले आफ्नो डेब्यू खेलको अन्तिम ओभरमा मेडन बनाएको छैन्।