काठमाडौं । इङल्याण्डले अस्ट्रेलियालाई जारी एशेजको तेस्रो खेलमा अप्रत्याशित रुपमा पराजित गर्यो । इङल्याण्डको जितका महानायक बने बेन स्टोक । स्टोक्सले १३५ रनमा अविजित रहदै इङल्याण्डलाई यो ऐतिहासिक जित दिलाएका छन् । यो जित पछि इङल्याण्ड सिरिजमा फर्किदै १-१ को बराबरी गर्न सफल भएको छ ।

यस खेल जितका लागि इङल्याण्डलाई ३५९ रनको लक्ष्य अस्ट्रेलियाले राखेको थियो । इङल्याण्ड २८६ रन बनाउदा ९ विकेट गुमाएर हारको नजिक पुगेको थियो । तर अन्तिम विकेटका लागि बेन स्टोक्स र ज्याक लीचले ७६ रनको साझेदारी गरे । तर लीचले भने केवल १ रन मात्र बनाएर स्टोक्सको साथ दिँदा स्टोक्सले ७५ रन बनाएका थिए ।

यो संघर्षपूर्ण जितपछि इङल्याण्डले अस्ट्रेलियाविरुद्धको आफ्नो ९१ बर्ष अगाडिको रेकर्ड तोड्दै अहिलेसम्मको ठूलो रन चेज गरेको छ । टेस्ट क्रिकेटमा इङल्याण्डले यस अघि सन् १९२८-२९ मा ३३२ रनको लक्ष्य चेज गरेको थियो । त्यस्तै इङल्याण्डले सन् २००१ मा अस्ट्रेलियाविरुद्ध ३१५ रन चेज गरेको थियो । त्यस्तै इङल्याण्डले सन् १९९६-९७ मा न्युजील्याण्डविरुद्ध ३०५ रन चेज गरेको थियो ।