काठमाडौं । अख्तियार अनुसन्धान दुरुपयोग आयोगले उपसचिव आनन्द केशरी पोखरेल सहित ३८ जना विरुद्ध विशेष अदालत काठमाडौंमा मुद्धा दायर गरेका छ।

यातायात व्यवास्था कार्यालय ललितपुरमा हुँदा २०६९ सालको बैसाखदेखि असार महिनासम्म सवारी चालक अनुमति पत्र (लाइसेन्स) लिने १ हजार २ सय ८४ जनाको नतिजामा गैरकानूनी फेरबदल गरी सरकारी सम्पति हिनामिना र हानिनोक्सानी गरेको आरोप लगाएको छ।

तत्कालिन कार्यालय प्रमुख पोखरेललाई भ्रष्टाचार निवारण ऐन २०५९को दफा ७ को (क) र (ग) दफा १२ र १३ बमोजिम कसुर गरेको स–प्रमाण पुष्टिहुन आएकोले ८ लाख ५९ हजार ५ सय ५० को बिगो दाबी गरिएको छ। यस्तै, हाल अवकास प्राप्त इन्जिनियर बासुदेव पोखरेललाइ ३ लाख ४६ हजार ७ सय ५० रुपैयाँको बिगो दाबी गरिएको छ ।

तत्कालिन प्रहरी निरिक्षक नवराज थापा र मुरारी मिश्रलाइ राजस्व चुहावट र हिनामिना गरेको कसुरमा क्रमशः २४ हजार ९ सय र २४ हजार ३ सय बिगो दाबी गरेको आइतबार प्रकाशित विज्ञप्तिमा जनाएको छ ।

कसुर गरेको स–प्रमाण सहित बिगो दाबी गरिएकामा शाखा अधिकृत राममणी पोखरेल ३५ हजार ९ सय, इश्वरराज रेग्मी ३० हजार, शम्भु प्रसाद थपलिया ११ हजार १ सय, धर्मराज ढुङ्गाना ३ हजार २ सय, र बाबुलाल रेग्मी ७ सय रहेका छन्।

तत्कालिन शाखा अधिकृत रहेका उनिहरुमध्ये बाबुलाल रेग्मी र धर्मराज ढुङ्गाना उपसचिवमा बढुवा भएका छन् भने ईश्वरराज रेग्मी निलम्बनमा परिसकेका छन्। यस्तै, राममणी पोखरेल अवकास प्राप्त हुन्।