काठमाडौं। झापामा अत्यन्तै दयनीय हालतमा जीवन यापन गर्दै आएका एक मजदूरको घरमा आगो लागेपछि घरभित्रका सामान जोगाउने क्रममा घरभित्रबाट लाखौं रुपैयाँका बण्डल निस्किएपछि उद्धार गर्न गएका सबै चकित परेका छन् । बाँसले बारेको सानो फुसको घरमा बस्ने र मजदूरीसँगै कवाडी संकलनको काम गर्ने कनकाई नगरपालिकाको वडा नं. ३, सुरुङ्गाका ठाकुरसिंह राईको घरबाट यसरी ठूलो रकम निस्किएको हो ।

शनिबार दिउँसो उनको घरमा आगो लागेको थियो । आगो लाग्दा राई भने कनकाई नगरपालिकाको कार्यालयमा राहत लिन पुगेका थिए । उनको हालत पहिलेदेखि नै निकै दयनीय देखिएकोले कोरोनाभाइरस महामारीको क्रममा उनलाई जीवनयापनमा समस्या हुने अनुमान गरी राहत दिन बोलाइएको थियो । उनलाई राहतको पाँच किलो चामल, एक किलो दाल र तेल दिइयो तर त्यही बेला उनको घरमा आगो लागेको थियो ।

आगो लागेपछि उद्धारमा गएकाहरुले उनको घरभित्रका सामान जोगाउने प्रयास गर्दा घरभित्र रहेको टिनको बाकसभित्र ठूलो परिमाणमा पैसा भेटियो । राईको झुपडीबाट ९ लाख रुपैयाँ सग्लै भेटियो । आधा जलेका पुराना नोट ५ देखि ६ लाख रुपैयाँ पनि भेटिए । राईले भने घरमा २४ लाख रुपैयाँ रहेको बताए ।

दयनीय हालतमा जीवनयापन गर्दै आएका राईको घरभित्र यति धेरै रकम भेटिएपछि यो रकम अवैध हुन सक्ने आशंका गरिएको थियो । तर, यो सबै रकमको स्रोत भने खुलेको छ । उनले २०४५ सालमा भारतबाट काम गरेर फर्किंदा ल्याएको रकमबाट जग्गा किनेको र ७ वर्षपछि त्यो जग्गा बेचेको तथा त्यही रकम विभिन्न व्यक्तिहरुलाई व्याजमा लगाएको खुलेको छ । त्यही व्याज लगाएको रकम बढ्दै जाँदा यति धेरै रकम भएको पुष्टि भएको छ ।

उनले ब्याजमा रकम दिएका व्यक्तिहरु पनि भेटिएर उनीसँग रकम लिएको पुष्टि गरेपछि यो रकम अवैध नरहेको पुष्टि भएको छ । राईले आफूसँग भएको रकम जोगाउँदै राख्ने तथा दैनिक मजदुरी गरेर कमाउँदै, नियमित आवश्यकता टार्दै रकम जम्मा गर्दै गएकोले यति धेरै रकम भएको पाइएको छ । उनले आफूसँग पैसा भए पनि त्यो पैसा न बैंकमा राखे न कुनै अचल सम्पत्ति किनेर लगानी गरे । उनले सबै पैसा घरमै राखिरहेको पाइएको छ । उनको घरमा भेटिएका अधिकांश नोट राजाको तस्वीर भएका पाइएका छन् । जसले उनले धेरै पहिलेदेखि नै घरमा रकम राखिरहेको कुरालाई पुष्टि गर्छ ।