कोपनहेगन। कोभिड–१९ का विषयमा हुन लागेको एक महत्वपूर्ण बैठकमा भाग लिनको लागि डेनमार्ककी प्रधानमन्त्री म्याट फ्रेडरिक्सनले आफ्नो बिहे स्थगित गरेकी छिन् । फ्रेडरिक्सनको बिहे स्थगित भएको यो तेस्रो पटक हो । यसअघि २ पटक उनको बिहे स्थगित भइसकेको छ यद्यपि स्थगित गर्नुपर्ने कारण भने फरक फरक थिए ।

म्याट र उनको फियोन्से बो टेनबर्गले जलाइ १८ मा बिहे गर्ने तय थियो । तर, यही दिन युरोपेली संघका राष्ट्रहरुका सरकार प्रमुखहरुको महत्वपूर्ण बैठक परेकोले फ्रेडरिक्सनले बिहे स्थगित गर्ने निर्णय गरेकी हुन् । कोभिड १९ महामारी सुरु भएपछि युरोपेली संघका सरकार प्रमुखहरु प्रत्यक्ष भेटेका छैनन् । १७ र १८ जुलाइमा पहिलो पटक उनीहरु प्रत्यक्ष भेट्दैछन् ।

यो बैठकमा महामारीबाट भएको आर्थिक क्षति र यससँग जुध्ने उपायबारे चर्चा हुनेछ । युरोपेली संघले ८४६ अर्ब डलरको प्रस्तावबारे विचार गर्दैछ । डेनमार्क, स्वेडेन, अष्ट्रिया र नेदरल्याण्डले यसको विरोध गरिरहेका छन् । उनीहरुले आथिृक सहयोग दिनुभन्दा पहिले त्यो देशले यो रकम फिर्ता दिनेछ भन्ने सुनिश्चित गर्नुपर्ने माग गरेका छन् । यही कारण प्रधानमन्त्री फ्रेडरिक्सनका लागि यो बैठक निकै महत्वपूर्ण छ ।

आफ्नो बिहे स्थगित गरेको बारे फेसबुक पोस्टमार्फत जानकारी दिँदै प्रधानमन्त्री फ्रेडरिक्सनले लेखेकी छिन् ‘मेरो लागि डेनमार्कको हितको रक्षा धेरै महत्वपूर्ण छ । म स्वयं यी शानदार व्यक्तिसँग बिहे गर्न चाहन्छु । तर, अहिले यो सजिलो देखिँदैन । ब्रसेल्समा बैठक छ । तर, हामी छिटै बिहे गर्नेछौं । मेरो पार्टनर संयम राख्ने व्यक्ति हुन् ।’ म्याट २०१९ मा ४१ वर्षको उमेरमा प्रधानमन्त्री बनेकी थिइन् । उनी देशकै सबैभन्दा कम उमेरकी प्रधानमन्त्री हुन् ।