काठमाडौं। भारतका विभिन्न राज्यमा चोरी गरेर फरार भएका नेपालीहरुलाई पक्राउ गर्न भन्दै पछिल्ला केही दिनमा भारतका तीन छुट्टाछुट्टै राज्यका पुलिसहरु नेपालसँगको सीमावर्ती राज्य उत्तराखण्डमा आएर ८ जना नेपालीलाई पक्राउ गरेर लिएर गएका छन् । ती नेपालीहरु भागेर उत्तराखण्ड आएको सूचनाका आधारमा पुलिस टिम आएको हो । महाराष्ट्र र तेलंगनाबाट आएको टोलीले केही नेपालीलाई पक्राउ गरेर लिएर गएको भए पनि पंजाबबाट आएको टोली रित्तै फर्किएको उत्तराखण्ड पुलिसलाई उद्धृत गर्दै हिन्दूस्तान टाइम्सले लेखेको छ ।

नवी मुम्बइमा एक डाक्टरको घरमा भएको चोरीमा संलग्न भएको आरोपमा रमेश सिंहलाई पक्राउ गर्न आएको टोली नैनितालमा उनकी श्रीमती बस्ने घरमान पुगेको थियो । त्यहाँ रमेश नभेटिएपछि घरको खानतलासीमा करिब ५ लाख मुल्यको एउटा सुनको बिस्कुट भेटिएको थियो । उनकी श्रीमतीले रमेश नेपाल भागेको बताएकी थिइन् । त्यसपछि पुलिस टिमले उनकी श्रीमतीलाई लिएर फर्किएको छ ।

पंजाबको लुधियानामा भएको अर्को घटनामा संलग्न भएको आशंकामा २ नेपालीलाई खोज्दै आएको पंजाब पुलिसको टोलीले सीमावर्ती शहर बनबासामा ३ दिनसम्म बसेर आरोपीहरुको खोजी गरेको थियो । तर, तीन दिनसम्म पनि केही हात नलागेपछि टोली सोमबार रित्तै फर्किएको छ । अक्टोबर ८ मा भएको घटनामा ती २ नेपालीले डेढ करोड बराबरको चोरी गरेको आरोप लगाइएको छ । तेलंगनाबाट आएको टोलीले विभिन्न चोरीको आधारमा ७ जना नेपालीलाई उत्तराखण्डबाट पक्राउ गरेर लिएर गएको समाचारमा जनाइएको छ ।