काठमाडौं। अमेरिकी राष्ट्रपति डोनाल्ड ट्रम्पले जनवरी २० मा निर्वाचित राष्ट्रपति जो बाइडेनको शपथ ग्रहण समारोहमा सहभागी नहुने बताइसकेका छन् । राष्ट्रपतिका रुपमा कार्यकालको अन्तिम दिन राष्ट्रपतिले के गर्छन् भन्ने प्रश्न छैन तर यस विषयमा अनुमान गर्न थालिएको छ । सम्भवतः उनले त्यस दिन फ्लोरिडामा एउटा र्याली गर्न सक्छन् वा उनी स्कटल्याण्डमा रहेको आफ्नो गल्फ क्लवतर्फ जान सक्छन् ।

ह्वाइट हाउस सूत्रका अनुसार ट्रम्प फ्लोरिडास्थित मार ए लागो रिसोर्ट जान सक्छन् । यसका लागि ट्रम्पले आफ्नो बोइङ ७५७ को प्रयोग गर्नेछन् । यदि उनको विमान जो बाइडेनले शपथ ग्रहण गर्नुभन्दा पहिले उड्यो भने यसलाई एयरफोर्स वनको स्थानमा एक्जिक्युटिभ वनको कलसाइन दिइनेछ । यदि ट्रम्प हावामा रहँदा नै बाइडेनले शपथ ग्रहण गरे भने हावामा रहेकै बेला विमानको कल साइन परिवर्तन गरेर सामान्य नागरिक विमानको कलसाइनमा परिवर्तन गरिनेछ ।

यस्तो घटना १९७४ मा पनि भएको थियो । त्यतिबेला राष्ट्रपति रिचर्ड निक्सन पनि बोइङ ७०७ विमान चढेर वाशिङटनबाट उडेका थिए । उनी क्यालिफोर्निया जाँदै थिए । निक्सन हावामा छँदै गेराल्ड फोर्डले राष्ट्रपतिको शपथ ग्रहण गरेपछि निक्सनको विमानको कलसाइन सामान्य नागरिक कलसाइनमा बदलिएको थियो ।२०१६ मा राष्ट्रपति पदको शपथ लिन जाने क्रममा ट्रम्पको निजी विमानलाई टाइसन १ कलसाइन दिइएको थियो ।

अमेरिकामा निवर्तमान राष्ट्रपति नयाँ राष्ट्रपतिको शपथ ग्रहण समारोहमा सहभागी हुने चलन छ । नयाँ राष्ट्रपतिले शपथ ग्रहण गरेर आफू पदमुक्त भएपछि राष्ट्रपति अन्तिम पटक एयरफोर्स वन चढेर आफ्नो गन्तव्य जान्छन् । पछिल्लो समय निवर्तमान राष्ट्रपति र प्रथम महिला हेलिकप्टर चढेर क्यापिटल हिल पछाडि ज्वाइन्ट बेस एन्ड्रयुज पुग्छन् । यो उडान ५ मिनेटको हुन्छ ।

एन्ड्रयुज पुगेपछि पूर्व राष्ट्रपति र प्रथम महिलालाई सैन्य सम्मान गार्ड अफ अनर दिइन्छ । पूर्व कर्मचारी, मित्र र अन्य व्यक्तिहरुले बधाइ दिन्छन् । पूर्व राष्ट्रपति बाराक ओबामा यो सैन्य सम्मानपछि क्यालिफोर्नियाको लागि उडेका थिए । उनको विमानलाई कल साइन स्याम ४४ दिइएको थियो ।

यदि अहिले ट्रम्प बाइडेनको शपथ ग्रहणभन्दा पहिल्यै निस्किए भने उनीसँग विशिष्ट सुरक्षा हुनेछ । यो सुरक्षा सधैं यात्राको क्रममा राष्ट्रपतिसँग हुन्छ । परमाणु हतियार नियन्त्रित गर्ने ब्रिफकेस ‘न्यूक्लियर फुटबल’ पनि उनको साथमै हुनेछ । सूत्रका अनुसार ह्वाइट हाउसको सैन्य कार्यालयले बाइडेनको लागि अर्को न्यूक्लियर फुटबल तयार गरिसकेको छ । शपथ ग्रहणपछि बाइडेनसँग हुने नयाँ ब्रिफकेस सक्रिय हुनेछ र ट्रम्पसँग भएको पुरानो ब्रिफकेस निष्क्रिय हुनेछ ।