काठमाडौं। अर्जेन्टिनामा एक महिलाले आफ्नी ‘मृत’ आमालाई जलाउनै लाग्दा केही सेकेण्ड पहिले मात्र आमा जीवितै भएको थाहा पाएपछि तत्कालै कर्मचारीहरुलाई रोकेर अनर्थ हुनबाट बचाएकी छिन् । ८९ वर्षकी आमाको पहिचान खुलाइएको छैन । उनलाई शनिबार छाती दुख्ने समस्या देखिएपछि उत्तर पूर्वी अर्जेन्टिनाको रेसिस्टेन्सियास्थित एक निजी अस्पतालमा भर्ना गरिएको थियो । भोलिपल्ट अस्पतालका डाक्टरले महिलाको हृदयाघातका कारण मृत्यु भएको भन्दै उनकी ५४ वर्षकी छोरीलाई मृत्यु प्रमाणपत्र दिए ।

अन्तिम संस्कारको लागि कर्मचारीहरुले महिलालाई जलाउनको लागि कन्भेयर बेल्टबाट आगो लगाउने ठाउँमा पठाउनै लागेका थिए । त्यही बेला छोरीले आमामा जीवनको संकेत देखेपछि तत्कालै कर्मचारीहरुलाई रोकिन् । अर्जेन्टिनाको अखबार डायरियो नोर्तेलाई उद्धृत गर्दै डेलीमेलले लेखेअनुसार महिला शनिबारदेखि एक निजी क्लिनिकमा थिइन् । भोलिपल्ट छोरी भेट्न आउँदा अस्पतालका डाक्टर र कर्मचारीले महिलाको मृत्यु भएको भनेर मृत्यु प्रमाणपत्र दिएका थिए ।

डाक्टरले आमाको मृत्यु भएको भनेपछि उनी भेलेज सार्सफिल्ड एभेन्यूमा रहेको अन्तिम संस्कार स्थलमा गइन् । कर्मचारीहरुले अन्तिम संस्कारको प्रक्रिया सुरु गरे । जब महिलालाई जलाउनको लागि इन्सिनेरेटर (विद्युतीय शवदाह मेसिन) भित्र हाल्न लागिएको थियो, त्यही बेला छोरीले आमा जीवितै रहेको चाल पाइन् र तत्कालै कर्मचारीलाई रोक्न भनिन् । आमालाई तत्काल अस्पताल फर्काइयो जहाँ अहिले उनको आइसीयूमा राखेर उपचार भइरहेको छ । स्थानीय अधिकारीले घटनाबारे थप अनुसन्धान भइरहेको बताएका छन् ।