काठमाडौं। विश्व स्वास्थ्य संगठन (डब्लुएचओ) ले धनी देशहरुलाई आफ्नो देशमा अहिलेलाई बालबालिकालाई खोप नलगाउन बरु बालबालिकालाई लगाउन लागिएको यो खोप गरिब देशहरुलाई दान गर्न आग्रह गरेको छ । महामारीसँग छिटो र शक्तिशाली तरिकाले लड्न सकियोस् भनेर यस्तो आग्रह गरिएको डब्लुएचओले जनाएको छ । डब्लुएचओका अनुसार महामारीको दोस्रो वर्ष पहिलो वर्षको तुलनामा खतरनाक छ ।

समाचार एजेन्सी रोयटर्सको एक रिपोर्टअनुसार डब्लुएचओका महानिर्देशक टेड्रोस एडेनहोम घेब्रिसियसले एक पत्रकार सम्मेलनमा कोभिड–१९ को वर्तमान स्थितिको बारेमा चर्चा गरे । यस क्रममा महानिर्देशक एडेनहोमले भने ‘धनी देशहरु बालबालिकालाई खोप लगाइरहेका छन् । म यसलाई रोक्न अपिल गर्छु । बालबालिकालाई खोप दिन प्रयोग भइरहेको डोज गरिब देशहरुलाई दान दिनुपर्छ ताकि महामारीसँग छिटोभन्दा छिटो र प्रभावकारी तरिकाले लड्न सकियोस् ।’

उनले अगाडि भने ‘हामी देखिरहेका छौं कि केही धनी देशहरु बालबालिका तथा युवाहरुलाई भ्याक्सिनेट गरिरहेका छन् । अर्कोतिर विश्वका ती गरिब देश छन् जहाँ अहिलेसम्म स्वास्थ्यकर्मीले पनि भ्याक्सिन पाएका छैनन् । हामी सबै देशहरुलाई भ्याक्सिन दिन चाहन्छौं ।’ डब्लुएचओको यो पत्रकार सम्मेलनमा महानिर्देशक एडेनहाम धनी देशहरुसँग धेरै असन्तुष्ट भएको देखिन्थ्यो ।

उनले थपे ‘जनवरीमै मैले प्रस्ट पारेको थिएँ कि खोप अभियान सुरु भएपछि नैतिक पतन हुनेछ । दुर्भाग्यवश अहिले हामीले यो प्रस्ट देखिरहेका छौं । केही यस्ता देश छन् जोसँग भ्याक्सिनको थुप्रो छ र उनीहरु ती मानिसहरुलाई पनि भ्याक्सिनेट गरिरहेका छन् जसलाई कोभिड–१९ बाट निकै कम खतरा छ ।म उनीहरुसँग फेरि अपिल गर्छु कि उनीहरु अब गरिब देशहरुलाई सहयोग गरुन् । त्यहाँ स्वास्थ्यकर्मीले पनि भ्याक्सिन पाएका छैनन् ।

विश्वभरी अहिलेसम्म १४० करोड डोज लगाइसकिएको छ । यीमध्ये ४४ प्रतिशत धनी देशका नागरिकलाई लगाइएको छ । यो विश्वको कूल जनसंख्याको १६ प्रतिशत हो । डब्लुएचओ प्रमुखले भने ‘हाम्रो लागि यो कठिन समय हो । महामारीको दोस्रो वर्ष पहिलो वर्षको तुलनामा धेरै खतरनाक प्रमाणित भइरहेको छ । योसँग जुध्नको लागि सावधान र भ्याक्सिनेसन एकसाथ लैजानु जरुरी छ । योबिना युद्ध जित्न कठिन हुनेछ ।’