काठमाडौं। अरब सागरबाट सुरु भएर भारतमा ठोक्किन आएको समुद्री आँधी ताउतेका कारण समुद्रमा फसेको भारतीय जहाज डुबेको छ । मुम्बइबाट १७५ किलोमिटरको दूरीमा रहेको हिरा आयल फिल्ड्स नजिकै फसेको भारतीय जहाज पी–३०५ समुद्रमा डुबेको हो । मुम्बइ मिररका अनुसार भारतीय नौसेनाले यो जहाजमा सवार १४६ जनाको उद्धार गरेको छ । १३० जनाभन्दा धेरै बेपत्ता छन् ।

यही ठाउँमा अर्को एक भारतीय जहाज फसेको छ । यो जहाजमा फसेकालाई उद्धार गर्नको लागि आइएनएस कोलकातालाई पठाइएको छ । अर्को जहाजमा १३७ जना सवार भएको बताइएको छ । यीमध्ये ३८ जनालाई सुरक्षित निकालिएको छ । भारतीय नौसेनाका प्रवक्ता कमाण्डर विवेक मधवालले भने ‘बाम्बे हाइ इलाकामा रहेको हिरा तेल क्षेत्रमा जहाज पी–३०५ को सहयोगको लागि आइएनएस कोच्चीलाई पठाइएको थियो । आइएनएस तलवारलाई पनि खोजी र राहत अभियानका लागि तैनाथ गरिएको थियो ।’

उनका अनुसार त्यही ठाउँमा फसेको अर्को जहाज जीएएल कन्स्ट्रक्टरबाट पनि आकस्मिक सहयोगको आग्रहसहितको सन्देश प्राप्त भएको थियो । यो जहाजमा १३७ जना सवार छन् । त्यो जहाज मुम्बइ तटबाट ८ नटिकल माइल (करिब १५ किलोमिटर) टाढा छ । यसको सहयोगको लागि आइएन्एस कोलकातालाई पठाइएको छ । नेभीका हेलिकप्टर स्ट्याण्डबाइमा राखिएको छ । मौसम सुधार भएपछि हेलिकप्टरलाई उद्धारमा परिचालन गरिनेछ ।