काठमाडौं। जनता समाजवादी पार्टीका अध्यक्ष महन्थ ठाकुरले निर्वाचन आयोगको आदेशविरुद्ध सर्वोच्च अदालतमा दायर गरेको रिटको सुनुवाइ न्यायाधीश कुमार रेग्मीको एकल इजलासमा परेको छ । न्यायाधीश रेमीको इजलासको लागि आज तोकिएका रिटहरुमध्ये अठौं नम्बरमा ठाकुरको रिट परेको छ ।

जनता समाजवादी पार्टीभित्र विवाद भएपछि सो विवाद समाधानका लागि निर्वाचन आयोगले केन्द्रीय कार्यकारिणी समितिका पदाधिकारीहरुको सनाखत गराउन आदेश दिएको थियो । सोही आदेश बदर गराउन माग गर्दै ठाकुर सर्वोच्च अदालत पुगेका हुन् । जनता समाजवादी पार्टीभित्र अहिले ठाकुर समूह र उपेन्द्र बाबुराम समूह गरी दुई ध्रुवमा नेताहरु विभाजित छन् ।

वैचारिक रुपमा विभाजित भएको र औपचारिक रुपमा मात्र विभाजन हुन बाँकी रहेको ठानिएको जनता समाजवादी पार्टीको विवादको मुद्दा न्यायाधीश रेग्मीको इजलासमा पर्दा यसले राजनीतिक वृत्तमा चर्चा पाएको छ । किनकि न्यायाधीश रेग्मी उनै हुन् जसले अर्का न्यायाधीश बमकुमार श्रेष्ठसँगको संयुक्त इजलासमा नेकपा विभाजन भएर नेकपा एमाले र नेकपा माओवादी केन्द्रको अस्तित्व कायम रहने फैसला गरेका थिए ।

नेकपाको नामको विषयमा ऋषि कट्टेलले दायर गरेको मुद्दामा रिट निवेदकले माग नै नगरेको विषयमा प्रवेश गर्दै क्षेत्राधिकारभन्दा अगाडि बढेर फैसला गरेको भन्दै यो फैसलाको अहिलेसम्म आलोचना हुने गरेको छ । अहिले उस्तै प्रकृतिको अर्को रिट पनि उनै रेग्मीको इजलासमा तोकिएपछि यसले चर्चा पाएको हो ।