काठमाडौं । दिल्लीको पटियाला हाउस कोर्टले बुधबार बलिउड अभिनेत्री ज्याकलिन फर्नान्डिजलाई सेप्टेम्बर २६ सम्म मनी लान्ड्रिंग मुद्दामा उपस्थित हुन बोलाएको छ।

प्रवर्तन निर्देशनालयले फर्नान्डिजको नाम २०० करोड रुपैयाँको मनी लान्ड्रिंगको मुद्दामा दायर गरेको आरोपपत्रमा समावेश गरेको छ।

पटियाला हाउस कोर्टका विशेष न्यायाधीश परवीन सिंहले अगस्ट १७ मा प्रवर्तन निर्देशनालयले पेश गरेको अतिरिक्त आरोपपत्र र यस मुद्दासँग सम्बन्धित तथ्यहरूलाई ध्यानमा राख्दै यो समन पठाएको हो।

प्रवर्तन निर्देशनालयले पहिलो पटक ज्याकलिन फर्नान्डिजलाई यस मुद्दाको आरोपपत्रमा अभियुक्तको रूपमा नाम दिएको छ। यस मुद्दामा सुकेश चन्द्रशेखर पनि संलग्न छन् जो हाल जेलमा छन् ।

फर्नान्डिजले यसअघि पटियाला हाउस कोर्टमा कामका लागि विदेश जान अनुमति मागेकी थिइन्। यो अनुरोध गर्दा फर्नान्डिजले यस प्रकरणको अनुसन्धानमा प्रवर्तन निर्देशनालयलाई सँधै सहयोग गरेको बताएकी थिइन् ।