सिरहा। चुनावको मिति नजिकिँदै गर्दा मतदाता योग्य र सक्षम उम्मेदवारको खोजी गर्न थालेका छन्। सत्ता गठबन्धन र एमाले नेतृत्वको विपक्षी गठबन्धनबीच चुनावी प्रतिश्पर्धा हुँदैछ।

विशेष गरी मधेस प्रदेशका जिल्लाहरुमा एमाले र जसपाबीच गठबन्धन भएको छ। एमाले र जसपाले मधेसमा सिट संख्या बढाउने रणनीति लिएका छन्।

मधेस प्रदेशको चर्चित जिल्ला सिरहा क्षेत्र नम्बर-४ (ख) बाट उम्मेदवारी दिएका जसपाका सुरेश मण्डल र गठबन्धनका उम्मेदवार रामबाबु यादववीच रोचक प्रतिस्पर्धा हुने भएको छ।

यसअघि सोही क्षेत्रबाट निर्वाचन भएका मण्डल यस पटक पनि जित निकाल्ने योजनामा छन्। मधेस आन्दोलन, विद्यार्थी राजनीतिबाट उदाएका युवा नेता मण्डललाई एमालेको पनि साथ रहेको छ। सिरहामा जसपा र एमालेको राम्रो जनाधार रहेका कारण आफू जित्नेमा ढुक्क रहेको नेता मण्डल बताउँछन्।

पाँच वर्ष प्रदेशसभा सदस्य रहँदा र राज्यमन्त्रीसमेत हुँदा आफूले जनस्तरमा गरेको काम, संसदमा खेलेको भूमिकाका कारण जनताले आफूलाई मन पराएको दाबी उनको छ।

मधेस प्रदेश सरकारमा राज्यमन्त्रीसमेत बनेका मण्डल आफूले मन्त्री हुँदा र प्रदेशसभा सदस्यका रुपमा आफ्नो क्षेत्रमा गरेको विकास नै जितको आधार भएको बताउँछन्।

आफ्नो क्षेत्रमा प्रत्यक्ष विकासको अनुभूति गराउन र जनताको समस्या सदनमा आवाज बुलन्द बनाउन सक्ने क्षमता भएका कारण पनि आफूलाई जनताले मतदान गर्ने उनको विश्वास छ।

मधेसका जिल्लाहरुमा एमाले र जसपाबीच चुनावी तालमेल भएका कारण पनि आफू विजयी हुनेमा उनी ढुक्क देखिन्छन्। दुई नम्बर प्रदेशको नामाकरण मधेस प्रदेश गर्नमा नेतृत्वदायी भूमिका निर्वाह गरेका मण्डल राज्यमन्त्री हुँदा शिक्षा, स्वास्थ्य, सडक र सिँचाइमा उल्लेखनीय बिकास निर्माण गरेका र समाजिक तथा पारिवारिक स्तरमा जनतासँग घुलमिल भएका आफूजस्तो उम्मेदवार नभएका कारण आफ्नो जित सुनिश्चित हुने उनको विश्वास छ।

यसअघि तत्कालीन राजपाबाट सोही निर्वाचन क्षेत्रबाट निर्वाचित मण्डल पार्टी विभाजनपछि जसपामा नै बसे। उनी मधेसको माग र मुद्दा उठान गर्ने र व्यवस्थापन गर्ने मुख्य पार्टी जसपा नै भएको भन्दै जसपाबाटै मधेसका माग सम्वोधन हुने बताउँछन्।

सामाजिक, आर्थिक र राजनीतिक रुपमा पछि परेको मधेस प्रदेशमा सक्षम, शिक्षित र राजनीति सुझबुझ भएका व्यक्तिलाई अगाडि बढाउनु पर्ने र त्यसका लागि युवा नेतृत्व आवश्यक रहेको उनको भनाइ छ। निर्वाचनपछि मधेस प्रदेशमा जसपा नेतृत्वमा सरकार गठन हुने र सो सरकारले मधेसमा विकासको लहर ल्याउने मण्डलले दाबी गरेका छन्।