काठमाडौँ। काठमाडौँको नर्भिक इन्टरनेशनल हस्पिटलले मृगौला प्रत्यारोपण सेवा सुरु गरेको छ। विगत ३० वर्षदेखि अन्तर्राष्ट्रियस्तरको स्वास्थ्य सेवा प्रवाहमा कटिबद्ध रहँदै आएको यस हस्पिटलले आज पत्रकार सम्मेलन गर्दै मृगौला प्रत्यारोपण सेवाको समेत सुरुवात गरेको जानकारी गराए।

नर्भिकले हालसम्म २ व्यक्तिको मृगौलाको सफलतापूर्वक प्रत्यारोपण सम्पन्न गरिसकेको छ। मृगौला फेल भई उपचार गराइरहेका ६६ वर्षीय पुरुषमा उनकी ५५ वर्षीया पत्नीले दान दिएको मृगौला सफलतापूर्वक प्रत्यारोपण गरिएको छ भने ५४ वर्षीय अर्का पुरुषमा उनकी ३० वर्षीया छोरीले दिएको मृगौलाको सफल प्रत्यारोपण गरिएको हो।

आगामी दिनमा यो सेवालाई बिस्तार गर्दै लाने अस्पतालले जनाएको छ। नर्भिक अस्पतालका विज्ञ चिकित्सकद्वय डा. राकेश बर्मा र डा. आरके अग्रवाल नेतृत्वको विज्ञ तथा सल्लाहकारहरुको टिमले मृगौला प्रत्यारोपण सेवा दिँदै आएको छ भने मृगौला प्रत्यारोपणको खर्च १२ देखि २० लाख रुपैयाँ लाग्ने हस्पिटलले जानकारी दिएको छ।

सफलतापूर्वक मृगौला प्रत्यारोपण सम्पन्न गरिएका २ वटा केशमध्ये पहिलो केश केही जटिल रहेको हसिपटलले जनाएको छ। पहिलो पटक नर्भिकमा मृगौला प्रत्यारोपण गरिएको बिरामीमा मुटुको धमनीमा समस्या लगायतका जटिलता थियो।

तर, नर्भिकमा भएको सबै खालका स्वास्थ्य समस्याको स्तरीय उपचार सेवाको सहज उपलब्धताका कारण जटिल हुँदाहुँदै पनि सफलतापूर्वक प्रत्यारोपण भएको छ।

मल्टिस्पेशालिटी हस्पिटल भएका कारण मृगौला प्रत्यारोपण अघि र पछि देखिने अन्य स्वास्थ्य समस्याको समाधान पनि एउटै छानामुनि हुने र यस्ता केन्द्रहरुमा प्रत्यारोपणका क्रममा जोखिम कम हुने भएका कारण समेत नर्भिकमा सुरु भएको मृगौला प्रत्यारोपण सेवाले विशेष महत्व राख्दछ।

यही सम्मेलन मार्फत् नर्भिक इन्टरनेशनल हस्पिटलले कलेजो प्रत्यारोपण सेवा पनि बिस्तार गर्ने उद्देश्यले अनुमति लिने प्रक्रिया पनि अगाडि बढाइसकेको छ।

नर्भिक अस्पतालले सन् १९९३ देखि विश्वस्तरीय स्वास्थ्य सेवा प्रवाह गर्दै आएको छ। हाल नर्भिककम देशकै पहिलो र एक मात्र जेनेटिक ल्याबसहितको आइभिएफ (टेस्टट्युब बेवी) सेन्टर समेत सञ्चालनमा छ। यस्तै, नर्भिकमा विगत लामो समयदेखि प्रत्येक शनिबार यूरोलोजी टिमले निःशुल्क परामर्श सवा समेत उपलव्ध गरोदै आएको छ।