काठमाडौं । भारतीय क्रिकेट टोलीको ड्रेसिङ रुममा प्रधानमन्त्री नरेन्द्र मोदीको भ्रमणलाई लिएर धेरैले प्रश्न उठाइरहेका छन् । जसमा कीर्ति आजाद पनि पर्छन्, जो सन् १९८३ मा भारतलाई पहिलो विश्वकप जिताउने टोलीका सदस्य थिए।

आइतवार अहमदाबादमा भारत र अस्ट्रेलियाबीचको विश्वकप फाइनलपछि प्रधानमन्त्री मोदीले खेलाडीहरूसँग भेट गरेका थिए। फाइनलमा अस्ट्रेलियासँग भारतीय टोली पराजित भएको थियो ।

समाचार एजेन्सी एएनआईले आज जारी गरेको भिडियोमा प्रधानमन्त्री मोदी हारबाट निराश खेलाडीहरूसँग कुरा गरिरहेको देख्न सकिन्छ। यो भिडियो भारतीय क्रिकेट टिमको ड्रेसिङ रुममा रेकर्ड गरिएको देखिन्छ ।

यस भिडियोमा भारतीय क्रिकेट टोलीका खेलाडीका अलावा केन्द्रीय गृहमन्त्री अमित शाह पनि देखिएका छन् । भिडियो सार्वजनिक भएपछि प्रधानमन्त्री मोदी ड्रेसिङ रुममा गएकोबारे प्रश्न उठ्न थालेका छन् ।

सन् १९८३ मा पहिलो विश्वकप जित्ने टोलीका सदस्य तथा तृणमूल कांग्रेसका नेता कीर्ति आजादले एक्स (ट्विटर) मा पोस्ट लेखेर प्रश्न उठाएका छन् ।

उनले लेखेका छन्, “कुनै पनि टोलीको ड्रेसिङ रुम सबैभन्दा पवित्र ठाउँ हो। खेलाडी र सपोर्ट स्टाफ बाहेक आइसीसीले कसैलाई पनि यी कोठामा प्रवेश गर्न दिँदैन। भारतीय प्रधानमन्त्रीले टोलीलाई भेट्न चाहेमा बाहिर निजी भ्रमण गर्ने ठाउँमा भेट्नुपर्छ । म यो एक खेलाडीको रूपमा भन्दैछु, राजनीतिज्ञको रूपमा होइन।”

यसै क्रममा लेखक तथा वरिष्ठ खेल पत्रकार आनन्द वासुले पनि यस विषयमा प्रश्न उठाएका छन् ।

उनले लेखेका छन्, “यो एक अलोकप्रिय विचार हो। तर खेलाडी र सहयोगी स्टाफका लागि ड्रेसिङ रुमलाई मात्र सुरक्षित र सुनसान ठाउँका रूपमा छोडिएको छ। यो ठाउँ उनीहरूको मात्रै रहिरहनुपर्छ। हो, यो सत्य हो कि उनीहरूले कहिलेकाहीँ ड्रेसिङ रुमबाट भिडियोहरू रिलिज गर्छन्। । तर त्यस्ता केसहरूमा भिडियोको सामग्री, अवधि, सन्दर्भ, रेकर्डिङ र रिलिजको समयमा उनीहरूकै नियन्त्रण हुन्छ।”