काठमाडौं। प्रतिनिधिसभा सदस्य एकनाथ ढकालले नेपालको खस्कँदै गएको अन्तर्राष्ट्रिय सम्बन्धको बारेमा सभामुखमार्फत सरकारको ध्यानाकर्षण गराएका छन्।

सोमबार बसेको प्रतिनिधिसभाको बैठकमा बोल्दै पूर्वमन्त्री समेत रहेका ढकालले विश्वका १८१ मुलुकसँग नेपालको द्विपक्षीय सम्बन्ध र ३० मित्र राष्ट्रमा नेपाली दुतावास हुँदा पनि अन्तर्राष्ट्रिय सम्बन्ध भने निरन्तर कमजोर हुँदै र बेवास्तामा पर्दै गएकोप्रति चिन्ता व्यक्त गरे।

संघीय सांसद ढकालले सन् २००६ मा ७६ औं स्थानमा रहेको नेपाली पासपोर्ट २०२४ मा १०३ औं स्थानमा झर्नु गरिबी, बेरोजगार, भ्रष्टाचार र सरकारको कमजोर कुटनीतिको कारण हो भन्दै नेपालमा शक्तिशाली मित्र राष्ट्रहरुबाट सरकार प्रमुखको भ्रमण नहुनुको कारण के हो ? भन्दै प्रधानमन्त्रीलाई प्रश्न गरे।

केही समयअगाडि भएको सयुक्त राष्ट्रसंघका महासचिवको भ्रमण पनि योजनाबद्ध नभई आकस्मिक भएको ढकालको जिकिर थियो। ‘के नेपाल सधै क्षेत्रीय राजनीतिको चपेटामा पिल्सीयर बस्ने हो’ ? उनले संसदमा प्रश्न गरे।

ढकालले कतिपय मित्रराष्ट्रले काठमाडौंमा दुतावास हुँदापनि नेपालीलाई भिसा आवेदन गर्न दिल्ली जानुपर्ने वाध्यता सिर्जना गर्नु आपत्तीजनक छ भन्दै यो विषय देशको प्रतिष्ठासँग जोडिएकोले उच्चस्तरीय कार्यदल बनाएर समाधान खोज्नु उचित हुने ढकालले सुझाव दिए ।

उनले भने, ‘गठबन्धन सरकारको घैटोमा घाम लागोस्, कुटनीतिमा पनि प्राथमिकता जाओस।’