काठमाडौं । इजरायली आक्रमणको सामना गरिरहेको गाजाको उत्तरी भागको मुख्य शहरमा अराजकता र लुटपाटको अवस्था सिर्जना भएको छ।

विगत केही हप्तादेखि, यस क्षेत्रमा आवश्यक सहयोग पुग्न सकेको थिएन। यहाँ बस्ने प्यालेस्टिनीहरू खानाको खोजीमा भौतारिरहेका छन्।

हमासद्वारा सञ्चालित गृह मन्त्रालयले बिहीबार इजरायली हवाई आक्रमणमा गाजा शहरको बजारमा तैनाथ आफ्ना सात प्रहरी अधिकारीहरूको मृत्यु भएको बताएको छ। हमासका अनुसार यी अधिकारीहरू कानून र व्यवस्था कायम राख्न व्यस्त थिए।

इजरायली सेनाले घटनाको बारेमा कुनै टिप्पणी गरेको छैन तर विगत केही दिनमा गाजामा “दर्जनौं आतंकवादी लक्ष्यहरू” मा प्रहार गरेको बताएको छ।

स्थानीय डाक्टर र उद्धारकर्मीहरूले बिहीबार यस क्षेत्रमा कम्तीमा ४४ जनाको मृत्यु भएको बताएका छन्, जसमा केन्द्रीय बुरेज शरणार्थी शिविरमा २३ जना पनि समावेश छन्।

यसअघि, संयुक्त राष्ट्रसंघले मध्य शहर देइर अल-बलाहमा रहेको यसको गोदाममा “भोका मानिसहरूको भीड” ले आक्रमण गर्दा कम्तीमा दुई जनाको गोली लागी मृत्यु भएको बताएको थियो।

इजरायलको नाकाबन्दीको बीचमा ११ हप्तापछि राहत सामग्री यस ठाउँमा पुगेको हो। गोली कसले चलायो भन्ने अझै स्पष्ट भएको छैन।