काठमाडौं । फ्रान्सको पेरिसमा प्रहरी र फुटबल क्लव पेरिस सेन्ट-जर्मेनका समर्थकहरू बीच भएको झडपपछि प्रहरीले लगभग ३०० जनालाई पक्राउ गरेको छ।

पेरिस सेन्ट-जर्मेन (पीएसजी) का फ्यानहरू च्याम्पियन्स लिगको फाइनलमा विजयको उत्सव मनाइरहेका बेला यी झडपहरू भएका थिए।

पीएसजीको रंगशाला पार्क डेस प्रिन्सेस र च्याम्प्स-एलिसेस क्षेत्रमा ठूला स्क्रिनमा लगभग ५० हजार मानिसहरूले खेल हेरे।

जितपछि केही मानिसहरूले पटाका पड्काए, बस स्टपहरू तोडफोड गरे र सवारी साधनहरूमा आगजनी गरे।

प्रहरीले करिब ३०० जनालाई पक्राउ गरेको बताएको छ। यीमध्ये धेरैजसो मानिसहरूलाई पटाका राखेको र तोडफोड गरेको आरोपमा पक्राउ गरिएको थियो।

उत्सवको समयमा सम्भावित अराजकतालाई ध्यानमा राख्दै पेरिसमा ५ हजार ४०० भन्दा बढी प्रहरी तैनाथ गरिएको थियो।

धेरै ठाउँमा प्रहरी र भीडबीच झडप भएको थियो। भीडलाई तितरबितर पार्न पानीको फोहोरा र अश्रुग्यास प्रयोग गरिएको थियो।

पीएसजीले च्याम्पियन्स लिगको फाइनल जित्दै पहिलो पटक युरोपको सबैभन्दा ठूलो ट्रफी जित्यो।

फ्रान्सेली राष्ट्रपति इमानुएल म्याक्रोनले पीएसजीलाई उनीहरूको जितमा बधाई दिँदै भने, “बधाई छ, हामी तपाईंमाथि गर्व गर्छौं। आज पेरिस युरोपको राजधानी हो।”