काठमाडौं । इन्डियन प्रिमियर लिग (आईपीएल) २०२५ को क्वालिफायर २ को क्रममा ढिलो ओभर रेट (समयमा ओभर पूरा नगरेको ) को कारण पञ्जाब किंग्सका कप्तान श्रेयस अय्यर र मुम्बई इन्डियन्सका कप्तान हार्दिक पाण्ड्यालाई जरिवाना गरिएको छ।

आइतबार अहमदाबादमा मुम्बई र पञ्जाबबीच आईपीएल क्वालिफायर २ खेल भएको थियो, जहाँ पञ्जाबले मुम्बईलाई ५ विकेटले पराजित गर्दै फाइनलमा आफ्नो स्थान बनाएको थियो।

तर यस खेलमा ढिलो ओभर रेटका कारण अय्यरलाई २४ लाख रुपैयाँ र हार्दिक पाण्ड्यालाई ३० लाख रुपैयाँ जरिवाना गरिएको छ।

आईपीएलको आधिकारिक वेबसाइटका अनुसार, आईपीएलमा पञ्जाबले नियम उल्लङ्घन गरेको यो दोस्रो पटक हो र मुम्बईले निर्धारित समयमा आफ्नो ओभर पूरा नगरेको यो तेस्रो पटक हो।

साथै, पञ्जाबको प्लेइङ एघारका बाँकी खेलाडीहरूलाई ६ लाख रुपैयाँ वा उनीहरूको म्याच शुल्कको २५ प्रतिशत (जुन कम हुन्छ) जरिवाना गरिएको छ। जबकि, मुम्बईका खेलाडीहरूलाई १२ लाख रुपैयाँ वा उनीहरूको म्याच शुल्कको ५० प्रतिशत जरिवाना गरिएको छ।

आईपीएलको यस सिजनको फाइनल खेल जुन ३, मंगलबार अहमदाबादमा रोयल च्यालेन्जर्स बैंगलोर र पञ्जाब किंग्सबीच खेलिनेछ।