काठमाडौं । युक्रेनको सुरक्षा सेवाले बिहानको कारबाहीमा रूसलाई उसले कब्जा गरेको क्रिमियासँग जोड्ने पुलमा क्षति पुर्‍याएको बताएको छ।

युक्रेनले महिनौंको तयारीपछि पुल मुनिको पानीमा लगभग १,१०० किलोग्राम विस्फोटक पदार्थ राखिएको र मंगलबार बिहान ५ बजे टाढाबाट विस्फोट गराइएको बताएको छ।

युक्रेनले यस विस्फोटमा पुलका खम्बाहरूमा क्षति पुगेको दाबी गरेको छ। केर्च स्ट्रेटमा तीन घण्टाको लागि दुई पटक यातायात रोकिएको थियो, तर अब पुनः सुरु भएको छ।

यो पुल रुसी सेनाको लागि युक्रेनमा सामान र हतियार पुर्‍याउने महत्त्वपूर्ण मार्ग हो। युद्ध सुरु भएदेखि यो घटना अघि दुई पटक यसलाई निशाना बनाइएको छ।

आइतबार, युक्रेनले चारवटा रुसी हवाई अड्डाहरूमा ठूलो ड्रोन आक्रमण गर्‍यो। यस आक्रमणमा रुसका एक तिहाइ रणनीतिक बमवर्षकहरू नष्ट भएको अनुमान गरिएको छ।