काठमाडौं । अमिताभ बच्चनको लोकप्रिय र सफल फिल्म ‘डन’ का निर्देशक चन्द्र बारोटको मुम्बईमा निधन भएको छ। ८६ वर्षीय चन्द्रले आइतबार बिहान ७ बजेतिर बान्द्राको गुरु नानक मल्टी स्पेशलिटी अस्पतालमा अन्तिम सास फेरे।

अस्पतालका एक वरिष्ठ डाक्टरले नाम नबताउने सर्तमा भने, “दश दिन अघि चन्द्र बारोटलाई धेरै गम्भीर अवस्थामा अस्पतालमा भर्ना गरिएको थियो। त्यतिबेला उनी श्वासप्रश्वासमा समस्याबाट पीडित थिए, उनको रक्तचाप पनि सामान्य भन्दा धेरै कम थियो।”

वरिष्ठ डाक्टरका अनुसार चन्द्र बारोटको स्वास्थ्य झन् बिग्रियो र केही दिनमै उनलाई आईसीयूमा भर्ना गरियो, तर उनलाई बचाउने सबै प्रयासहरू व्यर्थ साबित भए। आइतबार बिहान हृदयघातका कारण चन्द्रले अन्तिम सास फेरे।

१९७८ को सुपरहिट फिल्म ‘डन’ मा अमिताभ बच्चन, जीनत अमान र प्राणले अभिनय गरेका थिए। यसअघि चन्द्र बारोट सहायक निर्देशक थिए । उनले ‘पुरब और पश्चिम’ (१९७०), ‘यादगार’ (१९७०), ‘शोर’ (१९७२), ‘रोटी कपडा और मकान’ (१९७४) जस्ता फिल्महरूमा सहायक निर्देशकको रूपमा काम गरे।

फिल्म ‘डन’ को पटकथा सलीम-जावेदले लेखेका थिए। २००६ मा, जावेद अख्तरका छोरा फरहान अख्तरले ‘डन’ नामको फिल्मको रिमेक बनाए। यसमा शाहरुख खानले अमिताभ बच्चनले निभाएको दोहोरो भूमिका निभाएका थिए।