बाजुरा। बाजुराको सदरमुकाम मार्तडी बजार यतिबेला सुनसान बनेको छ। नेपालीहरुको महान चाड बिजयादशमी तथा शुभदिपावली मनाउन यहाँका व्यापारी लगायत अन्य स्थानीय घर गए पछि बजार सुनसान बनेको हो।

केही दिन अघिसम्म निकै चहलपहल बढेको मार्तडीमा अहिले भने चहलपहल निकै घटेको छ।यहाँ बसोबास गर्ने व्यापारी तथा अन्य अधिकांश स्थानीय चाडबाड मनाउन गाउँघर गएसँगै मार्तडी बजार केही दिन यतादेखि सुनसान बन्दै गएको हो।

स्थानीयहरु धमाधम गाउँघर गए पछि बजार सुनसान बनेको माथिल्लो बजारस्थित बडीमालिका एण्ड रविन्द्र फेन्सि स्टोरका प्रोपाईटर जयराज उपाध्यायले बताए। दसैं तिहार नजिकिँएकोले सबै आ–आफ्नो घर गएपछि बजार सुनसान बनेको उपाध्याले बताएका छन्।

केही दिन अघि बजारमा व्यापार व्यवसाय निकै फस्टाएको थियो,अहिले उपभोक्ता समेत बजारमा नआउने हुँदा व्यापार समेत घटेको उपाध्यायको भनाइ छ। सबै होटल तथा पशल बन्द भएका छन्।दशै सकिए लगत्तै विस्तारै पशलहरु खुल्दै जाने उनले बताए।

सदरमुकाम मार्तडी जिल्लाकै ठुलो र प्रमुख व्यापारीक केन्द्र हो। मार्तडी बजार संगै यहाँको बुढिगङ्गा नगरपालिकाको बाम्का,डाब,फालाशैन,गौमुलको घट्मुना,बुढिनन्दा नगरपालिकाको कोल्टी,जगन्नाथको पिलिचौर,हिमालीको धुलाचौर लगायतका बजार सुनसान बनेका छन्। अष्टमी नवमी दशमी र पूर्णिमासम्म बाजुराका ९ वटै स्थानीय तहका गाउँबस्तीमा दसैँ मनाईने गरिन्छ।

दसैँ तिहार मनाए पछि मात्रै स्थानीयहरु बजार आउने गर्दछन्। बाहिर गएकाहरू बजार नआउँदासम्म यहाँका बजार केही समयको लागी सुनसान हुने गरेका छन्।अस्थायी रुपमा बसोबास गर्दै आएकाहरू नागरिक प्रत्येक वर्ष दसैँ तिहारमा गाउँ जाने हुँदा तिहार अवधिवर यहाँका बजार सुनसान नै हुने गरेका छन्।