काभ्रेपलाञ्चोक। बीपी राजमार्गमा असोज १६ गतेदेखि २१ गतेसम्म रातिको समयमा सवारी सञ्चालनमा रोक लगाइएको छ।

स्थानीय प्रशासनले मनसुन सक्रिय हुने र भारी वर्षाको जोखिम बढेको भन्दै साँझ ५ बजेदेखि बिहान ५ बजेसम्म सार्वजनिक तथा निजी यात्रुबाहक सवारीसाधन सञ्चालन नगर्ने निर्णय गरेको हो।

काभ्रे भञ्ज्याङ-भकुण्डेबेसी–सिन्धुली सडकखण्डमा एम्बुलेन्स र अन्य अत्यावश्यक सेवाका सवारीसाधन भने चल्न पाउनेछन्। जिल्ला सुरक्षा समिति र विपद् व्यवस्थापन समितिको निर्णयअनुसार स्थानीय प्रहरी र ट्राफिक प्रहरीले आवश्यक देखिए जुनसुकै समयमा सवारी रोक्न सक्नेछन्।

प्रमुख जिल्ला अधिकारी उमेशकुमार ढकालका अनुसार रोशी खोला र स्थानीय खहरे खोलामा बाढी आउने सम्भावना रहेकाले थप सतर्कता अपनाइएको हो।

जिल्ला प्रशासन कार्यालय काभ्रेले एक विज्ञप्ति जारी गर्दै अत्यावश्यक नभई बाहिर ननिस्कन, विशेषगरी टाढा र रातिको समयमा यात्रा नगर्न, नदी किनार र पहिरोको उच्च जोखिम रहेका क्षेत्रमा सतर्क रहन सबैलाई आग्रह गरेको छ।

गत वर्ष असोज ११ र १२ गतेको भारी वर्षा, बाढी र पहिरोका कारण बीपी राजमार्गमा ठूलो क्षति पुगेको थियो । क्षतिग्रस्त भागमा अझै पुनर्निर्माण नसकिएकोले यसपालि पनि जोखिम कायमै रहेको प्रशासनले जनाएको छ।

त्यसैले बीपी र अरनिको राजमार्गका आयोजनाले डोजर, एस्काभेटर, लोडरलगायतका उपकरण तयारी अवस्थामा राख्ने, पूर्वतयारी तथा प्रतिकार्यमा सहयोग गर्न सरोकारवाला निकायहरूलाई सतर्क रहन आग्रह गरिएको छ।