काठमाडौं । ब्राजिलको रियो दि जेनेरियोमा प्रहरीले लागूऔषध तस्कर संगठन ‘रेड कमान्ड’ विरुद्ध अहिलेसम्मकै ठूलो कारबाही सुरु गरेको छ। मंगलबार बिहान २५०० प्रहरीले राजधानी रियो दि जेनेरियोमा हेलिकप्टरबाट अपराधीहरूको बसोबास गर्ने क्षेत्रहरूमा छापा मारेका थिए।

प्रहरी टोलीहरू अगाडि बढ्ने बित्तिकै रेड कमान्ड गिरोहका सदस्यहरूले गोलीबारी गर्न थाले। अधिकारीहरूका अनुसार गिरोहले सडकमा जलिरहेको ब्यारिकेड राखेको थियो र प्रहरीलाई रोक्न ड्रोनबाट बम खसालेको थियो। बदलामा प्रहरीले भारी हतियार प्रयोग गरेको थियो।

झडपमा चार प्रहरीसहित कम्तिमा ६४ जनाको मृत्यु भएको छ। रिपोर्टहरूले प्रहरीले एक वर्षदेखि आक्रमणको योजना बनाइरहेको संकेत गरेको छ।

प्रहरीले एक दिन लामो मुठभेडमा ८० भन्दा बढी व्यक्तिहरूलाई पक्राउ गर्‍यो। यस कारबाहीले नजिकै बसोबास गर्ने लगभग ३ लाख बासिन्दाहरूमा त्रास फैलियो र अवस्थालाई “युद्ध क्षेत्र” भनेर वर्णन गरियो ।

गोलीबारीमा धेरै नागरिकहरू पनि घाइते भएका छन् भने धेरै सडकहरू बन्द छन्। क्षेत्रका बासिन्दाहरूले दिनभरि गोलीबारी र विस्फोटको आवाज गुन्जिरहेको र मानिसहरूलाई घरबाट बाहिर निस्कनबाट रोकेको बताएका छन्।

ब्राजिल सरकारका अनुसार यो क्षेत्र रेड कमान्डको लागि एक प्रमुख आधार मानिन्छ जुन लामो समयदेखि लागूपदार्थ तस्करी, हतियार आपूर्ति र तटीय मार्गहरूको नियन्त्रणको लागि परिचित गिरोह हो।

यस कारबाहीमा २०० किलोभन्दा बढी लागूऔषध, धेरै राइफल र अन्य हतियारहरू बरामद भएको प्रहरीले जनाएको छ।

कोमान्डो भर्मेल्हो (सीभी) ब्राजिलको सबैभन्दा पुरानो र सबैभन्दा शक्तिशाली आपराधिक संगठन हो। यो लागूऔषध र हतियारको तस्करीमा संलग्न छ। अंग्रेजीमा रेड कमान्ड भनेर चिनिने यो गिरोह १९७० को दशकमा स्थापना भएको थियो।

त्यतिबेला ब्राजिल सरकारले वामपन्थी नेताहरूलाई जेल हाल्यो। जेलमा यी कैदी नेताहरूले प्रहरीको क्रूरताबाट आफूलाई बचाउन सामान्य अपराधीहरूसँग गठबन्धन बनाए। पछि यो संगठन जेल प्रणाली बाहिर विस्तार भयो र अपराधको संसारमा प्रवेश गर्यो।

रेड कमान्डको मुख्य गढ रियो दि जेनेरियो हो तर यो छिमेकी देशहरूसम्म फैलिएको छ। संगठनको कुनै एकल नेता छैन। प्रत्येक क्षेत्रमा कमान्डेन्ट भनिने एक हाकिम हुन्छ, जसले त्यस क्षेत्रको व्यवसाय नियन्त्रण गर्दछ।

ब्राजिलका ती क्षेत्रहरूमा रेड कमान्डले शासन गर्छ जहाँ सरकारी प्रणाली कमजोर छ। तिनीहरूले गरिब क्षेत्रहरूमा खाना वितरण गर्छन्। रेड कमान्डको शासन हिंसा र डरमा आधारित छ।

प्रहरीका अनुसार रेड कमाण्डले विगत केही महिनादेखि निरन्तर नयाँ क्षेत्र कब्जा गर्ने प्रयास गरिरहेको छ र अर्को समूह, थर्ड प्योर कमाण्डको क्षेत्रमा पनि घुसपैठ गरिरहेको छ, जसले गर्दा हिंसात्मक घटनाहरू भइरहेका छन्।

यसलाई रोक्नको लागि प्रहरीले दुई क्षेत्र कम्प्लेक्सो दो अलेमाओ र कम्प्लेक्सो दा पेन्हामा रहेको रेड कमाण्ड बेसहरूमा आक्रमण गरेको बताएको छ। प्रहरीले आफ्नो उद्देश्य रेड कमाण्ड बेसहरू नष्ट गर्नु, उनीहरूका हतियार र पैसा जफत गर्नु र उनीहरूका नेताहरूलाई पक्राउ गर्नु रहेको बताएको छ।