नवलपरासी (बर्दघाट सुस्तापश्चिम)। पश्चिम नवलपरासीमा मङ्गलबारदेखि परेको बेमौसमी वर्षाले धान, तोरी, आलुलगायत बालीमा क्षति पुर्‍याएको छ। वर्षाले धानबालीमा क्षति गरेपछि किसानहरू चिन्तित बनेका छन्।

धान काटेर भित्र्याउने समयमा परेको वर्षाले धानसहित तोरी र आलुखेती पनि क्षति पुगेको कृषि ज्ञान केन्द्रका प्रमुख डा रविन्द्रनाथ चौबेले बताए। उनले भने, ‘नवलपरासीमा यो वर्ष २० हजार ४८० हेक्टरमा धानबाली लगाइएको थियो। अहिलेसम्म ६० देखि ७० प्रतिशतमात्र किसानले मात्र बाली भित्र्याएका छन्। बाँकी केही किसानले काटेर खेतमा राखेका र केहीले नकाटी ठडिएकै अवस्थामा छ।’

सबैभन्दा बढी क्षति वर्षाले ढलेको र काटेर खेतमा छाडेको धानबालीमा भएको चौबेले बताए। ठडिएको धान घाम लागेपछि केही हदसम्म सुधार हुनसक्छ भन्दै पानीमा डुबेको धानलाई यो वर्षाले ठूलो क्षति गरेको उहाँले जानकारी दिए। साथै धान काटेर तोरी र आलु लगाउने समय भएकाले तोरी र आलुमा पनि यो वर्षाले असर गरेको उनको भनाइ छ।

पश्चिम नवलपरासीमा तीन हजार १३९ हेक्टरमा तोरी र एक हजार ७०२ हेक्टरमा आलुखेती हुने गरेको केन्द्रका वरिष्ठ बाली संरक्षण अधिकारी एवं सूचना अधिकारी उमाशङ्कर पौडेलले बताए। उनले भने, ‘यो समय दलहन (दालखेती) लगाउने बेला हो, अहिलेको वर्षाले किसानलाई धान थन्काउन र तोरी, आलु लगाउन समस्या पारेको छ।’