काठमाडौं । सिमरा विमानस्थल बन्द गरिएको छ । एमाले नेता शंकर पोखरेल र महेश बस्नेत चढेको विमानलाई विमानस्थलमा अवतरण गर्न नदिने भन्दै जेनजी युवाहरू प्रदर्शनमा पत्टिएपछि विमानस्थलको उडान प्रभावित भएको हो ।

एमाले नेताहरू बारामा आयोजना गरिएको एक कार्यक्रममा जाने भएपछि विमानस्थल घेराउ गरिएको हो । विमानस्थलमा एमाले नेताहरू अच्यूत मैनाली, किसान श्रेष्ठ र ज्वालाकुमारी साह रहेका छन्। नेपाल प्रहरी र सशस्त्र प्रहरीले कडा सुरक्षा दिइरहेको छ।

स्थिति नियन्त्रणबाहिर गएको र नियन्त्रणमा लिने प्रयास भइरहेको बाराका प्रहरी प्रमुख एसपी सन्तोष तामाङले बताएका छन् । तामाङका अनुसार बाराका प्रमुख जिल्ला अधिकारी धर्मेन्द्रकुमार मिश्रले आज दिउँसो साढे १२ बजेदेखि कर्फ्यु आदेश जारी गरेका छन् ।

कर्फ्यू लागू हुने क्षेत्र
गण्डक नहरदेखि पथलैया सडकखण्डः राजमार्गको दायाँ-बायाँ ५०० मिटर

सिमरा विमानस्थल परिसरः चारैतिर ५०० मिटर क्षेत्र

कर्फ्यू अवधिमा अत्यावश्यक सेवासँग सम्बन्धित सवारी–साधन, एम्बुलेन्स, दमकल, शववाहन, स्वास्थ्यकर्मी, सञ्चारकर्मी, पर्यटक सवारी, मानव अधिकार तथा कूटनीतिक नियोगका सवारी र हवाई टिकट बोकेका यात्रुहरूको आवागमन सुरक्षाकर्मीले सहजीकरण गर्ने प्रशासनले जनाएको छ।

प्रशासनले परिस्थितिलाई नियन्त्रणमा ल्याउन तथा सार्वजनिक सुरक्षालाई प्राथमिकता दिँदै सबैलाई कर्फ्यू आदेश पूर्ण रूपमा पालना गर्न अनुरोध गरेको छ।