काठमाडौं । धनगढी गेटास्थित सहिद दशरथ चन्द स्वास्थ्य विज्ञान विश्वविद्यालयको सभाले मंगलबार उपकुलपति र रजिस्ट्रार नियुक्त गरेको छ।

सहकुलपति तथा शिक्षा, विज्ञान तथा प्रविधि मन्त्री महावीर पुनको अध्यक्षतामा बसेको सभा बैठकले उपकुलपतिमा प्राध्यापक डाक्टर सुनिलकुमार जोशी र रजिष्ट्रारमा खेमराज जोशीलाई नियुक्त गर्ने निर्णय गरेको शिक्षा मन्त्रालयले जनाएको छ।

उपकुलपतिका लागि २ जना र रजिष्ट्रारका लागि १० जनाको आवेदन परेको थियो। नियुक्तिका लागि सिफारिस समितिले उपकुलपतिमा सुनिलकुमार जोशीको नाम एकल सिफारिस गरेको थियो भने रजिष्ट्रारमा ३ जनाको नाम सिफारिस भएका थिए। उपकुलपतिका लागि तेस्रो पटक दरखास्त माग गरेपछि मात्र आवेदन परेको थियो। ती मध्ये पनि १ जनाको दरखास्त योग्यता नपुगेको भन्दै समितिले रद्द गरेको थियो।

गत असारमा विश्वविद्यालयको ऐन संसद्बाट पारित भएपछि सरकारले उपकुलपति र रजिस्ट्रार नियुक्तिको प्रक्रिया अघि बढाएको थियो। सुदूरपश्चिम प्रदेशमा चिकित्सा शिक्षाको पठनपाठन थाल्न विश्वविद्यालय स्थापना र सञ्चालनको तयारी भइरहेको छ। पहिलो उपकुलपति र रजिष्ट्रार नियुक्तिका लागि सुदूरपश्चिम विश्वविद्यालयका पूर्वउपकुलपति जयराज अवस्थीको संयोजकत्वमा ३ सदस्यीय छनोट तथा सिफारिस समिति गठन गरिएको थियो।