काठमाडौं । नेपाली कांग्रेसले माघ ११ गते हुने राष्ट्रिय सभा सदस्य निर्वाचनका लागि विभिन्न प्रदेशबाट उम्मेदवार टुंगो लगाएको छ।

पार्टीका कार्यवाहक सभापति पूर्णबहादुर खड्काको सभापतित्वमा ललितपुरस्थित केन्द्रीय कार्यालय बी.पी. स्मृति भवनमा आज बसेको केन्द्रीय कार्यसम्पादन समितिको बैठकले केन्द्रीय संसदीय समितिद्वारा सिफारिस गरिएका उम्मेदवारहरूको मनोनयन अनुमोदन गरेको हो।

राष्ट्रिय सभा सदस्य निर्वाचन ऐन, २०७५ को दफा १८ अनुसार गरिएको मनोनयन नेपाली कांग्रेसको विधान, २०१७ (संशोधनसहित) को धारा ३२(९) बमोजिम भएको पार्टीले जनाएको छ।

पार्टीका अनुसार कोशी प्रदेशबाट सुनिलबहादुर थापा, मधेश प्रदेशबाट धमेन्द्र पासवान र रन्जित कर्ण, बागमती प्रदेशबाट गीता देवकोटा, गण्डकी प्रदेशबाट जगत तिमिल्सिना उम्मेदवार चयन भएका छन्।

त्यसैगरी लुम्बिनी प्रदेशबाट वासुदेव जंगली र चन्द्रबहादुर के.सी, कर्णाली प्रदेशबाट ललितजंग शाही तथा सुदूरपश्चिम प्रदेशबाट खम्मबहादुर खाती उम्मेदवार रहेका छन्।

बैठकमा महामन्त्री गगनकुमार थापा, सहमहामन्त्रीहरू फरमूल्लाह मंसुर र महेन्द्र यादव, केन्द्रीय सदस्य विजयकुमार गच्छदार र अर्जुननरसिंह के.सी, पार्टी प्रवक्ता डा. प्रकाशशरण महत तथा लुम्बिनी प्रदेश सभापति अमरसिंह पुनले धारणा राखेका थिए।

नेपाली कांग्रेसले समावेशी प्रतिनिधित्वलाई ध्यानमा राख्दै महिला, दलित तथा अपाङ्गता-अल्पसंख्यक समूहबाट उम्मेदवार चयन गरिएको जनाएको छ।