काठमाडौं। नेपाली कांग्रेस डडेलधुरा प्रतिनिधिसभा सदस्यका उम्मेदवार नैनसिंह महरले घरदैलो अभियानलाई तीव्रता दिएका छन्। उनी आफ्ना चुनावी एजेण्डा बोकेर जनताको घरदैलोमा पुग्ने गरेका छन्।

महरले घरदैलोका क्रममा आफूले पूर्वप्रधानमन्त्री एवं कांग्रेस पूर्वसभापति शेरबहादुर देउवाको विरासतलाई उचो हुने गरि काम गर्ने प्रतिवद्धतासमेत जनाउने गरेका छन्।

‘डडेलधुरा देव भूमि हो। यस पावन भूमिले भीमदत्त पन्त, द्वारिकादेवी ठकुरानी, एनडी प्रकाश चटौत, शेरबहादुर देउवा जस्ता सपुत जन्माएको छ। नेपालको लोकतान्त्रिक आन्दोलनमा श्रद्धय नेता शेरबहादुर देउवाको अतुलनीय भूमिका छ। म उहाँको उत्ताराधिकारी बनेर आएको छु। उहाँका बाँकि सपना र योजना पूरा गर्न तपाईंहरूको अमूल्य मत पाउनेमा म विश्वस्त छु,’ उनले भने।

महरले डडेलधुरा मात्र नभइ आफू सुदूरको समृ्द्धिका लागि कटिबद्ध भएर काम गर्ने प्रतिवद्धतासमेत व्यक्त गरेका छन्। ‘कांग्रेस हिजो जनताको साथमा थियो। आज पनि जनताकै साथमा छ र भोली पनि तपाईंहरूसँग नै रहने छ। त्यसैले डडेडधुराको विकासका लागि रुख चिन्हमा मतदान गरेर मलाई विजयी गराइदिनु होला,’ उनले भने।

उनले डडेलधुरा प्रचुर सम्भावना बोकेको जिल्ला भएको स्मरणसमेत गरेका छन्। ‘हामीले डडेलधुरा सदरमुकामलाई पहाडकी रानी भन्छौं। यसको विकास गर्नुपर्ने छ। यसको सुन्दरतामा थप इट्टा थप्दै पर्यटकको आगमनलाई पढाउनुपर्ने छ। अजयमेरु कोटलाई पर्यटकीय गन्तव्यका रुपमा विकास गर्नुपर्ने छ। भागेश्वर धामको धार्मिक संरक्षण तथा प्रवर्द्धन गर्नुपर्ने छ,’ उनले भने।

पर्शुराम र आलिताल जस्ता धार्मिक र एतिहासिक स्थलको प्रवर्द्धन गर्नसके ठूलो संख्यामा पर्यटक भित्र्याउन सकिने उनले विश्वास व्यक्त गरेका छन्। नवदुर्गादेखि गन्यापधुरासम्मको धार्मिक पर्यटकको विकासमा आफूले विशेष जोड दिने उनले प्रतिवद्धता जनाएका छन्। ‘यस जिल्लाका धार्मिक तथा पर्यटकीय क्षेत्रको वृत्ति विकास गरेर युवाहरूलाई रोजगारीको मूल प्रवाहमा ल्याउने मेरो अभिष्ट छ,’ उनले भने।

उनले जनताले आफूलाई दिइरहेको आशिरवाद र सुझावसहितका प्रतिक्रियाले थप जिम्मेवार बन्न प्रेरित गरिरहेको बताएका छन्। डडेलधुरा ३४ वर्षदेखि देउवा चुनाव जित्दै आएको क्षेत्र हो।

यसपटक महरसँग चुनावी प्रतिस्पर्धामा नेकपा एमालेबाट पूर्व राष्ट्रियसभा सदस्य चक्र स्नेही, नेपाली कम्युनिस्ट पार्टीबाट मानसिंह माल रहेका छन्। त्यसैगरी राष्ट्रिय स्वतन्त्र पार्टी (रास्वपा)बाट डा. तारा जोशी, राष्ट्रिय प्रजातन्त्र पार्टीका तर्फबाट गोविन्द खडायत चुनावी मैदानमा छन्। त्यसैगरी श्रम संस्कृति पार्टीबाट महेन्द्र पुन उम्मेदवार छन्।