काठमाडौं। हिजो मात्र पदबाट राजीनामा दिएका निवर्तमान संचार तथा सूचना प्रविधिमन्त्री गोकुल बास्कोटाले शुभकामना दिँदा गाली ओइरिएको छ । बास्कोटाले आज बिहान ट्वीट गर्दै शिवरात्रीको शुभकामना दिएका थिए । त्यही शुभकामनाका जवाफ दिँदै ट्वीटर प्रयोगकर्ताले उनलाई गाली गरेका हुन् ।

प्रत्येक वर्ष फागुन चतुर्दशी दिन मनाइने महाशिवरात्री पर्वको अवसरमा सबै हिन्दू धर्मावलम्बीहरूमा हार्दिक मंगलमय शुभकामना व्यक्त गर्दछु।

— Gokul Prasad Baskota (@GokulPBaskota) February 21, 2020

बास्कोटाले सेक्युरिटी प्रिन्टिङ प्रेस खरिद गर्ने क्रममा कमिशन मागेको दावी गरिएको अडियो बुधबार मध्यरातमा सार्वजनिक भएपछि हिजो बिहानैदेखि उनको तीव्र आलोचना भइरहेको छ । बास्कोटाको भनिएको टेलिफोन वार्तामा उनले ७० करोड कमिशन मागेको सुनिएको छ । यही कारण हिजो दिनभर तीब्र आलोचना भएपछि उनले पदबाट पनि राजीनामा दिइसकेका छन् ।