केन्द्रिय बैंकले २३ अर्ब बढी ट्रेजरी बिल जारी गर्दै, दिउँसो ३ बजे बोलकबोल हुने
काठमाडौं। नेपाल राष्ट्र बैंकले २३ अर्ब ८३ करोड रुपैयाँ बराबरको ट्रेजरी बिल जारी गर्ने भएको छ। आन्तरिक ऋण उठाउन राष्ट्र बैङ्कले २८ दिने, ९१ दिन, १८२ दिन र ३६४ दिन गरी ४ किसिमको ट्रेजरी बिल जारी गर्न लागेको हो।
केन्द्रीय बैंकले २८ दिनको लागि ५ अर्ब रुपैयाँको ट्रेजरी जारी गर्न लागेको हो। यो ट्रेजरी २०८० बैशाख ५ गते परिपक्व हुनेछ। ९१ दिनको लागि ५ अर्ब ५३ करोड रुपैयाँको ट्रेजरी जारी गर्न लागेको हो। यो ट्रेजरी २०८० असार ५ गते परिपक्व हुनेछ।
यस्तै गरि, १८२ दिनको लागि ४ अर्ब ३० करोड रुपैयाँको ट्रेजरी जारी गर्न लागेको हो। यो ट्रेजरी २०८० असोज २ गते परिपक्व हुनेछ। यस्तै, ३६४ दिनको लागि ९ अर्ब रुपैयाँको ट्रेजरी जारी गर्न लागेको हो। यो ट्रेजरी २०८० चैत ६ गते परिपक्व हुनेछ। मंगलबार जारी हुने यस ट्रेजरी बिलका लागि सोमबार दिउँसो ३ बजे बोलकबोल हुने राष्ट्र बैंकले जनाएको छ।
ट्रेजरी बिल १ वा १ वर्षभन्दा कम अवधिको आन्तरिक ऋण उठाउन प्रयोग गरिने अल्पकालीन सरकारी ऋणपत्र हो। भुक्तानी मिति अगावै ट्रेजरी बिलको प्रमाणपत्र खरिद गर्न, वैधानिक तरलता अनुपात, स्थायी तरलता सुविधा तथा अन्तर बैंक कारोबारमा प्रयोग गर्न सकिने व्यवस्था छ।
व्यक्तिको हकमा ट्रेजरी बिलको प्रमाणपत्र धितो राखी बैंक तथा वित्तीय संस्थाबाट ऋण लिन पनि पाइने व्यवस्था गरेकाे छ। सबै वर्गका बैंक तथा वित्तीय संस्था, संगठित संस्था तथा सर्वसाधारण नागरिक समेत ट्रेजरी बिलको बोलकबोलमा सहभागी हुन सक्नेछन्।
Facebook Comment