काठमाडौं । इंग्ल्याण्डसँग पराजित भएपछि पाकिस्तानको विश्वकप यात्रा रोकिएको छ । टोलीको खराब प्रदर्शनपछि हारको दोष कप्तान बाबर आजममाथि लगाइएको छ ।

उनलाई कप्तानबाट हटाउन माग भइरहेको छ । यस्ता माग गर्नेमा धेरै पूर्व क्रिकेटर पनि छन् ।

यद्यपि, टोलीका उपकप्तान शादाब खान उनको समर्थनमा उभिएका छन् र कप्तानलाई हटाउन माग गर्नेहरूलाई ‘आफ्नो सोच परिवर्तन गर्न’ भनेका छन्।

केही महिनाअघि पाकिस्तानी टोली आईसीसीको वरीयतामा पहिलो नम्बरमा थियो र विश्वकपको बलियो दावेदारमा गनिएको थियो तर यो टोली सेमिफाइनलसम्म पुग्न सकेन । पाकिस्तानी टोलीले सुरुवाती खेल जितेको थियो तर भारतसँग सात विकेटले पराजित भएपछि उसको गति बिग्रियो ।

पाकिस्तानले सन् २०२३ को विश्वकपमा नौ खेल खेलेको थियो र चार मात्रै जित्न सकेको थियो । पाकिस्तानले नेदरल्याण्ड, श्रीलंका, न्युजिल्यान्ड र बंगलादेशलाई मात्र पराजित गरेको छ ।

अफगानिस्तानसहित अन्य टोलीसँग पाकिस्तान पराजित भएको छ । टोलीको हरेक पराजयपछि बाबर आजमको कप्तानीको आलोचना हुने गरेको छ । अहिले उनलाई कप्तानबाट हटाउने माग बढ्दै गएको छ ।

हालैसम्म आईसीसी एकदिवसीय ब्याट्सम्यानको सुचीमा पहिलो नम्बरमा रहेका बाबर आजमले विश्वकपका ९ खेलमा ३२० रन मात्र बनाउन सकेका थिए ।

शादाब खानले बाबर आजमलाई समर्थन गर्दै टोलीको प्रदर्शन कप्तानको मात्रै जिम्मेवारी नभएको बताए ।

समाचार एजेन्सी पीटीआईका अनुसार उनले भने, ‘यस्तो सोच ठीक होइन । जब हामी जित्छौं, यसलाई कप्तानको जित भनिन्छ, तर जब हामी हार्छौं, यसलाई कप्तानको असफलता भनिन्छ।’

उनले भने, ‘यो सोच परिवर्तन हुनुपर्छ ।’