काठमाडौं। नेपाली कांग्रेसले संसदीय छानबिन समितिका विषयमा पार्टीले राखेको अडान कायमै राख्ने निर्णय गरेको छ।

सोमबार पार्टी सभापति शेर बहादुर देउवा निवास बुढानिलकण्ठमा बसेको कांग्रेस पदाधिकारी बैठकले छानबिन समितिको कार्यादेशमा रवि लामिछानेको नाम उल्लेख गर्नुपर्ने अडान कायमै राख्ने निर्णय गरेको हो।

बैठकपछि कांग्रेस सहमहामन्त्री जीवन परियारले कार्यदल र प्रधानमन्त्रीसंग भएको छलफलका बारेमा पार्टी पदाधिकारी बैठकमा छलफल भएको बताए। उनले अब प्रधानमन्त्रीसँग हुने छलफल पनि कांग्रेसले अघि सार्दै आएको मागका बारेमा नै अडान राख्ने निर्णय भएको जानकारी दिए। परियारले विगतदेखि राख्दै आएका कुरालाई अघि सार्ने र सहमतिको बिन्दु खोज्ने प्रयास गर्ने बताए।

त्यस्तै कांग्रेस महामन्त्री विश्वप्रकाश शर्माले गिरिवन्धुका विषयमा पहिला एमाले अध्यक्षले नै कांग्रेसमाथि आरोप लगाएकाले त्यसको प्रतिवाद गरेको बताए। उनले कसैमाथि लागेको आरोपको प्रतिवाद गर्ने छुट सबैलाई भएको भन्दै आफूले तथ्यसहित गिरिबन्धुका विषयमा धारणा राखेको उल्लेख गरे।

यसअघि सोमबार नै बालुवाटारमा बसेको शीर्ष नेताको बैठकमा एमालेका नेताहरुले केपी ओलीमाथि कांग्रेसले प्रायोजित पूर्वाग्राही तथ्यहीन गलत आरोप लगाएको भन्दै लिखित रूपमा क्षमायाचना गर्नुपर्ने र सार्वजनिक माफी माग्नुपर्ने जनाएका थिए।