काठमाडौं । गृहमन्त्री रमेश लेखकले आफूविद्धद्ध नियोजित रुपमा षड्यन्त्रपूर्ण आक्रमण भइरहेको बताएका छन्।

संसद् भवनको ल्होत्से हलमा पत्रकार सम्मेलन गर्दै गृहमन्त्री लेखकले आफूविरुद्धको आक्रमण पूर्वाग्रहपूर्ण रहेको टिप्पणी गरेका हुन्।

‘मेराविरुद्धको आक्रमण नियोजित छ, राजनीतिक पूर्वाग्रहले प्रेरित छ। षडयन्त्रपूर्ण क्रम जारी रहेको मैले महसुस गरेको छु,’ उनले भने।

उनले अख्तियारको अनुसन्धानको विषयलाई लिएर मन्त्रीको पनि संलग्नता भन्दै प्रचार गर्नु गलत भएको बताए। ‘मेरो संलग्नता देखाएर सामाजिक सञ्जालमार्फत धारणा र समाचार आएकोमा सत्यता छैन। मेरो कुनै संलग्नता छैन,’ उनले भने।

यसका साथै अध्यागमन कार्यालयमा सरुवा भएर गएका तीर्थराज भट्टराई आफूले कुनै मन्त्रालय वा विभागबाट ल्याएको कर्मचारी नभएको बताए।

‘म यो मन्त्रालयमा जिम्मेवारी लिएर आउँदा यही मन्त्रालयको कसुरजन्य सम्पत्ति व्यवस्थापन विभागमा महानिर्देशन भएर काम गरिराख्नुभएको थियो। उहाँलाई त्यहाँ सरुवा गरिएको हो। उहाँले यसअघि मन्त्रालयका महत्त्वपूर्ण जिम्मेवारी र प्रजिअ भएर काम गरिसक्नुभयो। जो मभन्दा अगाडिका मन्त्रीहरूको सरुवा र खटपटमा भएको हो,’ उनले भने।

गृहमन्त्री लेखकले अख्तियारले गर्ने छानबिनलाई सहयोग गर्नेसमेत बताएका छन्। उनले अख्तियारबाट हुने जुनसुकै छानबिनलाई आफूबाट खुल्ला रूपले सहयोग हुने बताएका छन्।