सिरहा। सडक सुरक्षाप्रति पर्याप्त ध्यान नदिँदा सिरहामा सवारीसाधन दुर्घटना बढ्दै गएको छ। चालु आर्थिक वर्ष २०८२/८३ को पहिलो छ महिनामा (साउनदेखि पुससम्म) यहाँ भएका सवारी दुर्घटनामा ३९ जनाले ज्यान गुमाएका छन्।

जिल्ला ट्राफिक प्रहरी कार्यालयका अनुसार दुर्घटनामा मृत्यु हुनेमध्ये ३० जना पुरुष, पाँच जना महिला र चार जना बालबालिका रहेका छन्। उक्त अवधिमा सवारीसाधन दुर्घटनामा परेर ३४५ जना गम्भीर र ७४२ जना सामान्य घाइते भएका कार्यालय प्रमुख प्रहरी निरीक्षक सालिकराम तिमिल्सिनाले जानकारी दिए।

छ महिनाको अवधिमा सबैभन्दा बढी मोटरसाइकल दुर्घटना भएको तथ्याङ्कले देखाएको छ। उपलब्ध विवरणअनुसार ४९८ मोटरसाइकल, ५८ वटा ई–रिक्सा (टेम्पो), २१ वटा ट्रयाक्टर र २० वटा ट्रक तथा ट्याङ्कर दुर्घटनामा परेका छन्।

यहाँ गत आव २०८१/८२ मा ८३ जना र आव २०८०/८१ मा ६८ जनाको दुर्घटनामा ज्यान गएको थियो। ट्राफिक प्रमुख तिमिल्सिनाले सवारीसाधन दुर्घटना न्यूनीकरणका लागि ट्राफिक प्रहरीले सवारीसाधनमा ‘रिफ्लेक्टर’ टाँस्ने अभियान सञ्चालन गर्नुका साथै विद्यालय तहमा सडक सुरक्षासम्बन्धी सचेतनामूलक कार्यक्रमलाई तीव्रता दिएको बताए।

दुर्घटना कम गर्न सवारी चालक मात्र नभई पैदलयात्री र स्थानीय बासिन्दा पनि उत्तिकै सचेत हुन आवश्यक रहेको उनको भनाइ छ।