इस्लामावाद। लामो समयदेखि जारी युद्ध र तनावका बीच संयुक्त राज्य अमेरिका र इरानबीच स्थायी युद्धविराम र शान्ति स्थापनाका लागि पाकिस्तानको राजधानी इस्लामावादमा उच्चस्तरीय वार्ता सुरु भएको छ। दुई हप्ताको अस्थायी युद्धविरामपछि दुवै पक्षका प्रतिनिधिहरू वार्ताका लागि आज एउटै सहरमा आइपुगेका हुन्।

यस पटकको वार्तामा मुख्यतया तीनवटा विषयलाई प्राथमिकता दिइएको छ। अस्थायी युद्धविरामलाई स्थायी रूप दिने र सैन्य झडपहरूलाई पूर्ण रूपमा अन्त्य गर्ने, हर्मुज विश्वव्यापी तेल आपूर्तिका लागि महत्वपूर्ण मानिने यो जलमार्गलाई सुरक्षित र खुला राख्ने विषयमा इरानसँग प्रतिबद्धता खोजिएको छ। अमेरिकाले इरानको परमाणु हतियार बनाउने क्षमता र उच्च संवर्धित युरेनियमको भण्डारलाई पूर्ण रूपमा हटाउनुपर्ने सर्त राखेको छ।

वार्ताका लागि अमेरिकी टोलीको नेतृत्व उपराष्ट्रपति जेडी भ्यान्सले गरिरहेका छन्, जसमा राष्ट्रपतिका विशेष दूत स्टिभ विट्कोफ र जारेड कुश्नर पनि सहभागी छन्। इरानी टोलीको नेतृत्व संसद्का सभामुख बाघेर कलिबाफले गरिरहेका छन्, जसमा विदेशमन्त्री अब्बास अराघची पनि सहभागी छन्।

पाकिस्तानले यो वार्ताको मध्यस्थता गरिरहेको छ। पाकिस्तानी प्रधानमन्त्री शाहबाज सरिफले दुवै देशका प्रतिनिधिहरूसँग छुट्टाछुट्टै भेटवार्ता गर्दै यस क्षेत्रमा दीर्घकालीन शान्ति स्थापनाका लागि यो वार्ता कोशेढुङ्गा सावित हुने विश्वास व्यक्त गरेका छन्।

अमेरिकी राष्ट्रपति डोनाल्ड ट्रम्पले इरानको नयाँ प्रस्तावलाई वार्ताको आधार मान्न सकिने बताए पनि इरानले बार्गेनिङ गरिरहेको आरोप लगाएका छन्। अर्कोतर्फ, इरानले वार्ता अघि बढ्नका लागि लेबनानमा जारी हमलाहरू रोकिनुपर्ने र आफ्ना रोक्का गरिएका सम्पत्तिहरू फुकुवा हुनुपर्ने माग राख्दै आएको छ।

सन् १९७९ पछि यो नै दुई देशबीचको सबैभन्दा उच्चस्तरीय र प्रत्यक्ष संलग्नताको प्रयास मानिएको छ। यद्यपि, दुवै पक्षका आफ्नै सर्तहरू रहेकाले वार्ता निकै जटिल हुने र ठोस नतिजा आउन केही समय लाग्ने विश्लेषण गरिएको छ।