काठमाडौँ । शिक्षा तथा खेलकुदमन्त्री सस्मित पोखरेलले संवाद र सरोकारवालाको सुझावका आधारमा शिक्षा क्षेत्रका समस्याको दिगो नीतिगत समाधान खोजिने बताएका छन्।

शिक्षामन्त्रीका रूपमा जिम्मेवारी सम्हालेदेखि नै शिक्षा क्षेत्रका विषयलाई गम्भीरतापूर्वक बुझ्न आफूले ‘सुन्ने र सिक्ने’ शैली अपनाउँदै आएको उनले बताएका छन्। सामाजिक सञ्जालमार्फत धारणा सार्वजनिक गर्दै मन्त्री पोखरेलले पहिलो १०० दिनमा तत्काल सुधार र सुशासनका लागि आवश्यक केही नियम तथा निर्देशिकामा काम गरिएको र अब मन्त्रालयको प्राथमिकता नयाँ शिक्षा ऐन, प्राविधिक शिक्षा ऐन तथा उच्च शिक्षामा समसामयिक सुधारतर्फ केन्द्रित रहेको बताए।

यसैक्रममा मन्त्रालयका प्रमुख सल्लाहकार तथा विद्यालय शिक्षा महाशाखा प्रमुखको टोलीले ‘शिक्षा संवाद’ कार्यक्रममार्फत सातै प्रदेशमा पुगेर शिक्षा क्षेत्रसँग सम्बन्धित सरोकारवालाका समस्या, सुझाव र अपेक्षा सङ्कलन गरिरहेको छ। संवादका क्रममा स्थानीय तह, शिक्षक, शिक्षा कर्मचारी, अभिभावक, विद्यालय तथा विद्यार्थीका सरोकार प्रत्यक्ष रूपमा सुन्ने काम भइरहेको मन्त्रालयले जनाएको छ।

प्रारम्भिक बाल विकास (इसिडी) सहजकर्ता, शिक्षक, विद्यालय व्यवस्थापन, विद्यालय कर्मचारी, अभिभावक तथा विद्यार्थीका समस्या र सरोकारलाई समेत संवादमा प्राथमिकताका साथ समेटिएको छ। स्थानीय तहको भूमिका, विद्यालय व्यवस्थापनका चुनौती तथा शिक्षा क्षेत्रका विभिन्न नीतिगत समस्याबारे प्राप्त सुझावलाई आगामी सुधारको आधार बनाइने मन्त्री पोखरेलले बताएका छन्।

भौतिक रूपमा ‘शिक्षा संवाद’ कार्यक्रममा सहभागी हुन नसक्ने सरोकारवालाका लागि ‘शिक्षा संवाद : सुझाव, समस्या तथा अपेक्षा सङ्कलन फारम’ मार्फत आफ्ना सुझाव, समस्या र अपेक्षा पठाउन सक्ने व्यवस्था गरिएको छ। प्राप्त सुझावलाई नीति निर्माणको प्रक्रियामा समेटिने मन्त्रालयले जनाएको छ।

त्यसैगरी, शिक्षा विभागले सातै प्रदेशमा स्थानीय सरकारलाई समेत सहभागी गराएर शिक्षा विधेयकका विषयमा सुझाव सङ्कलन गर्ने तयारी गरेको छ। राष्ट्रिय पाठ्यक्रम प्रारूप परिवर्तनका लागि गठित विज्ञ टोलीले समेत आफ्नो काम अन्तिम चरणमा पुर्‍याएको जनाइएको छ।

मन्त्री पोखरेलले सबै सरोकारवालाको कुरा सुन्दै, आवश्यक विषयमा विज्ञबाट सिक्दै र तथ्यका आधारमा निर्णय गरेर शिक्षा विधेयकको काम शीघ्र टुङ्ग्याउने प्रतिबद्धता व्यक्त गरेका छन्। शिक्षा क्षेत्रका समस्यालाई दीर्घकालीन रूपमा समाधान गर्न मन्त्रालय स्पष्ट र दृढ रहेको उनको भनाइ छ।

‘शिक्षा संवाद’ कार्यक्रममा सहभागी भई सुझाव, समस्या तथा अपेक्षा राख्न ९८५१०१४००६ मा सम्पर्क गर्न सकिने जनाइएको छ।