काठमाडौं। भारतीय टेलिभिजन रियालिटी शो ‘इन्डियन आइडल’ सिजन-३ का विजेता, चर्चित गायक तथा अभिनेता प्रशान्त तामाङ अब हामीबीच रहेनन्। ४३ वर्षको उमेरमा आइतबार बिहान भारतको नयाँ दिल्लीस्थित आफ्नै निवासमा हृदयघातका कारण उनको निधन भएको खबरले सम्पूर्ण नेपालीभाषी संसार शोकमा डुबेको छ।

दार्जिलिङका पहाडबाट उदाएका प्रशान्त केवल एक गायक वा अभिनेता मात्र थिएनन्, उनी संघर्ष, आत्मसम्मान र पहिचानको प्रतीक थिए। सन् १९८३ जनवरी ४ मा पश्चिम बंगालको दार्जिलिङमा जन्मिएका उनी नेपाली मूलका परिवारका सन्तान थिए।

सानै उमेरमा बुबा मदन तामाङलाई दुर्घटनामा गुमाएपछि जीवनले उनलाई चाँडै जिम्मेवार बनायो। पढाइ छोडेर परिवारको भार बोक्दै उनले जीवनको कठोर यथार्थसँग सम्झौता गर्न सिके।

संगीतको दुनियाँमा पाइला टेक्नुअघि प्रशान्त कोलकाता प्रहरीमा कन्स्टेबलका रूपमा कार्यरत थिए। प्रहरीको वर्दीमै इन्डियन आइडलको मञ्चमा उभिँदा उनले केवल गीत मात्र गाएनन्, आफ्नो पीडा, सपना र आशा पनि गाए।

उनको सरल व्यक्तित्व, भावनाले भरिएको स्वर र अथक मेहनतले दार्जिलिङ, सिक्किम, नेपाल र भारतभरिका नेपालीभाषी दर्शकहरूको मन जित्यो। अन्ततः उनी इन्डियन आइडल सिजन-३ का विजेता बने। यो जित केवल व्यक्तिगत उपलब्धि थिएन, सम्पूर्ण गोरखा समुदायको गौरव थियो।

इन्डियन आइडलपछि प्रशान्तले नेपाली, हिन्दी तथा अन्य भाषामा थुप्रै गीतहरू गाए। उनका गीतहरूमा जीवनका अनुभूति, पीडा र सरल भावनाको सुगन्ध पाइन्थ्यो। गायनसँगै उनले नेपाली चलचित्र क्षेत्रमा पनि आफूलाई स्थापित गरे। गोर्खा पल्टन, अङ्गालो यो मायाको जस्ता चलचित्रमा उनको स्वाभाविक अभिनयले दर्शकको मन छोयो।

कलामात्र होइन, समाजप्रतिको जिम्मेवारीमा पनि उनी सदैव सक्रिय रहे। विभिन्न कन्सर्ट र सामाजिक अभियानमार्फत उनी मानिसहरूसँग जोडिइरहे। सन् २०२१ मा आमालाई कोभिड-१९ का कारण गुमाउँदा उनी गहिरो शोकमा परे, तर पीडालाई शक्तिमा बदल्दै उनले आफ्नो कर्मयात्रा रोक्न दिएनन्। दुर्भाग्यवश, आइतबार उनी स्वयं असामयिक रूपमा यो संसारबाट विदा भए।

प्रशान्तको योगदान गोर्खा समुदायका लागि ऐतिहासिक रह्यो। इन्डियन आइडल जितमार्फत उनले दार्जिलिङ, तराई, डुवर्स, सिक्किम, उत्तर-पूर्व भारत, नेपाल र विश्वभर छरिएका गोरखाहरूमा एकता, आत्मगौरव र पहिचानको भावना जगाए। उनको सफलताले सांस्कृतिक उपहासविरुद्ध आवाज उठाउन साहस दियो र ‘हामी पनि सक्छौं’ भन्ने विश्वास बलियो बनायो।

उनको निधनप्रति कलाकारहरूबाट भावुक श्रद्धाञ्जली आइरहेका छन्। गायक प्रमोद खरेलले सामाजिक सञ्जालमा लेखेका छन्,‘कस्तो अप्रिय र अपत्यारिलो खबर सुन्नुपर्यो। प्रिय प्रशान्त तामाङ हामीबीच रहनु भएनछ। उफ ! वैकुण्ठमा वास होस्।’

यसैगरी संगीतकार अर्जुन पोखरेलले दुःख व्यक्त गर्दै लेखेका छन्, ‘नेपाली मन–मुटुमा बस्न सफल इन्डियन आइडल हामी माझ रहेनन् भन्ने खबरले मन भारी भयो। यो खबर असत्य होस् जस्तो लागिरहेछ। आत्माको चिरशान्तिको कामना।’

यसैगरी गायिका आस्था राउतले भिडियो सेयर गर्दै लेखेकी छन्, ‘अनन्त शान्तिमा विश्राम प्यारो प्रशान्त तामाङ दादा। सबै नेपालीभाषी नेपाली जातिका लागि यो ठूलो क्षति हो। विश्वास गर्नै सक्दिन कि दादा अब छैनन्। उहाँ शान्त स्वभावका, हास्यभाव भएका व्यक्ति हुनुहुन्थ्यो र सधैं नेपालप्रति चिन्तित रहनुहुन्थ्यो।’

प्रशान्त अब शारीरिक रूपमा हामीसँग छैनन्। तर उनको स्वर, संघर्षको कथा र गोरखा समुदायलाई दिएको आत्मसम्मान सधैं जीवित रहनेछ।
उनी केवल एक कलाकार होइनन् आशा, पहिचान र प्रेरणाको नाम हुन्, जो समय बिते पनि सधैं सम्झनामा रहिरहने छन्। गायक तथा अभिनेता तामाङको यो असामयिक निधनले उनको परिवार, प्रशंसकहरू र गीत संगीत क्षेत्रलाई गहिरो शोकमा डुबाएको छ।