काठमाडौं । फिफा विश्वकप २०२६ को सेमिफाइनल खेलमा अर्जेन्टिनासँग २-१ को पीडादायी पराजय बेहोरेपछि इङ्गल्याण्डका स्टार मिडफिल्डर जुड बेलिङ्घम र अर्जेन्टिनी खेलाडी भ्यालेन्टिन बार्कोबीच मैदानमा भएको झडपको नयाँ भिडियो फुटेज सार्वजनिक भएको छ।

सामाजिक सञ्चालनमा तीव्र रूपमा भाइरल भइरहेको उक्त नयाँ फुटेजले रियल मड्रिडका सुपरस्टार बेलिङ्घमले बार्कोको टाउकोको पछाडि किन झापड (स्ल्याप) हानेका थिए भन्ने कुराको स्पष्ट पृष्ठभूमि उजागर गरेको छ।

इङ्गल्याण्ड बाहिरिएपछि मैदानमा निकै निराश देखिएका बेलिङ्घमले अर्जेन्टिनाका वैकल्पिक गोलकिपरसँग हात मिलाइरहेका बेला नजिकै रहेका बार्कोले केही उत्तेजक शब्दहरू बोलेका थिए। स्पेनिस लिग (ला लिगा) मा खेलेका कारण स्पेनिस भाषामा पोख्त रहेका बेलिङ्घमले उक्त टिप्पणी सुन्नासाथ आक्रोशित भएर पूर्व ब्राइटन डिफेन्डर बार्कोमाथि हात उठाएका हुन्।

उक्त घटना लगतै उग्र रूपमा परिणत भएको थियो, जहाँ बार्कोले बेलिङ्घमलाई धक्का दिएपछि अर्जेन्टिनाका अनुभवी डिफेन्डर निकोलस ओतामेन्डी पनि भिडन्तमा सामेल हुन आइपुगेका थिए। स्थिति नियन्त्रण बाहिर जान लागेपछि इङ्गल्याण्डका गोलकिपरहरू जेम्स ट्राफोर्ड र डिन हेन्डरसनले मध्यस्थकर्ताको भूमिका निभाउँदै दुवै पक्षलाई शान्त पारेका थिए भने फरवार्ड ओली वाट्किन्सले क्रुद्ध बनेका बेलिङ्घमलाई घटनास्थलबाट टाढा लगेका थिए।

😱 ¡EL ENGANCHÓN DE BELLINGHAM CON LOS JUGADORES DE ARGENTINA TRAS EL FINAL!#NuestroMejorMundial #NuestroMejorMundialAS @jfelixdiaz @as_tv pic.twitter.com/9Y8rlgG2TL

— Diario AS (@diarioas) July 15, 2026

यसै समरमा स्ट्रासबर्गबाट चेल्सीमा आबद्ध हुने अपेक्षा गरिएका युवा खेलाडी बार्को उक्त सेमिफाइनल खेलमा मैदान उत्रने अवसर नपाए पनि इङ्गल्याण्डका खेलाडीहरूको आक्रोश भड्काउन मुख्य भूमिकामा देखिए। रंगशालाको दर्शकदीर्घाबाट खिचिएको भिडियोमा अर्जेन्टिनाका तर्फबाट एन्जो फर्नान्डेजले बराबरी गोल गरेलगतै बार्कोले इङ्गल्याण्डका खेलाडीहरूको अगाडि पुगेर जिस्काउँदै असामान्य उत्सव मनाएको प्रष्ट देखिएको थियो।

एटलान्टास्थित मर्सिडिज-बेन्ज स्टेडियममा खेलको सुरुवातदेखि नै दुवै टोलीबीच ठूलो मानसिक र शारीरिक तनाव सिर्जना भएको थियो। खेलका क्रममा अर्जेन्टिनी खेलाडीहरूले बेलिङ्घमलाई विशेष रूपमा लक्षित गर्दै आक्रामक हर्कतहरू गरेका थिए।

अर्जेन्टिनाका लेआन्द्रो पारेडेसले २३ वर्षीय बेलिङ्घममाथि निकै खराब ट्याकल गरे पनि रेफ्रीको कार्डबाट जोगिएका थिए भने टोटनह्यामका डिफेन्डर क्रिस्टियन रोमेरोले पनि इङ्गल्याण्डका यी मिडफिल्डरकै अगाडि उभिएर बल क्लियर गरेको खुसीयाली आक्रामक रूपमा मनाएका थिए।

Fan de la subtrama del colo barco
Por eso lo fueron a buscar al final https://t.co/v1EQNCE06J pic.twitter.com/3X62M0l6vG

— Lᴀᴜ del interior🇦🇷 (@laudelinterior_) July 16, 2026

विपक्षी टोलीका यी शृङ्खलाबद्ध उत्तेजक व्यवहारहरूका कारण खेलको अन्तिम सिट्ठी बजेलगत्तै इङ्गल्याण्डका खेलाडीहरूको धैर्यताको बाँध टुटेको देखिन्छ।

व्यक्तिगत टकराव बाहेक इङ्गल्याण्डको टोलीभित्रको निराशाको मुख्य कारण उनीहरूको रणनीतिक असफलता पनि थियो। एन्थोनी गोर्डनले सुरुवाती गोल गर्दै इङ्गल्याण्डलाई अग्रता दिलाए तापनि मुख्य प्रशिक्षक थोमस टुचेलले नतिजा जोगाउनका लागि टोलीलाई रक्षात्मक ‘ब्याक फाइभ’ (पाँच डिफेन्डर) को संरचनामा ढाल्ने निर्णय गरे।

प्रशिक्षकको यो आत्मघाती कदमका कारण विश्वविजेता अर्जेन्टिनाले खेलमा पुनरागमन गर्ने मौका पायो र अन्ततः अतिरिक्त समयमा लाउटारो मार्टिनेजको उत्कृष्ट हेडर गोलमार्फत जित सुनिश्चित गर्‍यो। खेलपछि प्रशिक्षक टुचेलले पराजयको पूर्ण जिम्मेवारी लिँदै रक्षात्मक रणनीतिले टोलीलाई दबाबमा ल्याएको स्वीकार गरे।

यसैबीच, विपक्षीको उत्तेजनाका कारण हात उठाएका जुड बेलिङ्घममाथि फिफाद्वारा खेलपछिको भिडियो प्रमाणका आधारमा कडा कारबाही हुन सक्ने सम्भावना बढेको छ। खेलका क्रममा रेफ्रीहरूले यो घटना नदेखेका भए तापनि स्पष्ट सामाजिक सञ्जालको भिडियो फुटेजका कारण फिफाले उनलाई जरिवाना वा खेल प्रतिबन्ध लगाउन सक्ने खेल विश्लेषकहरूको अनुमान छ।

यदि फिफाले कडा कदम चालेमा बेलिङ्घमले यसै शनिबार मियामीमा फ्रान्सविरुद्ध हुने तेस्रो स्थान (कांस्य पदक) को प्ले-अफ खेल गुमाउनुपर्नेछ। आफ्नो प्रमुख खेलाडीलाई गुमाउनु इङ्गल्याण्डका लागि ठूलो धक्का हुनेछ। हालका लागि इङ्गल्याण्ड तेस्रो स्थानको खेलका लागि केन्द्रित हुँदैछ भने विजेता अर्जेन्टिना स्पेनविरुद्ध न्यूयोर्कमा हुने ऐतिहासिक फाइनलको तयारीमा जुटेको छ।