पोखरा। पोखरा विश्वविद्यालयले आफ्ना चारवटा संकायमा रिक्त रहेका डिन पदपूर्तिका लागि खुला प्रतिस्पर्धात्मक प्रक्रियामार्फत आवेदन आह्वान गरेको छ।

विश्वविद्यालयले व्यवस्थापन संकाय, विज्ञान तथा प्रविधि संकाय, मानविकी तथा सामाजिक शास्त्र संकाय र स्वास्थ्य विज्ञान संकायका लागि योग्य, अनुभवी तथा इच्छुक उम्मेदवारहरूबाट दरखास्त माग गरेको हो।

डिन छनोट प्रक्रियालाई वस्तुनिष्ठ र नतिजामुखी बनाउन उम्मेदवारले सम्बन्धित संकायको रणनीतिक विकास तथा कार्यान्वयन सम्बन्धी स्पष्ट कार्ययोजना  र आफ्नो अद्यावधिक व्यक्तिगत विवरण  पेस गर्नुपर्नेछ।

विश्वविद्यालयका अनुसार पेस गरिने कार्ययोजनामा सम्बन्धित संकायको सबल र दुर्वल पक्ष एवम् अवसर र चुनौतीको विश्लेषण , रणनीतिक प्राथमिकता, प्रमुख प्रस्तावित कार्यक्रम तथा क्रियाकलाप, कार्यान्वयन योजना र सोको समयसीमा, आवश्यक स्रोत तथा बजेट व्यवस्थापन र अनुगमनका संयन्त्रहरू अनिवार्य रूपमा समेटिनुपर्नेछ।

खुला प्रतिस्पर्धाबाट डिन छनोट गर्दा उम्मेदवारको शैक्षिक योग्यता र कार्यअनुभवका साथै सम्बन्धित संकायको समग्र विकासका लागि प्रस्तुत गरिने रणनीतिक योजना र त्यसको सफल कार्यान्वयन क्षमतालाई प्रमुख आधार बनाइने विश्वविद्यालयले जनाएको छ।

चारवटै संकायमा खुला प्रतिस्पर्धामार्फत नयाँ डिन नियुक्त भएपछि विश्वविद्यालयको शैक्षिक, प्रशासनिक तथा रणनीतिक नेतृत्व थप सबल र प्रभावकारी हुने अपेक्षा लिइएको छ।