काठमाडौं। नेपाल राष्ट्र बैंकको मुद्रा व्यवस्थापन विभागले ५० रुपैयाँ दरको नयाँ बैंक नोट चलनचल्तीमा ल्याएको छ।

केन्द्रीय बैंकले आजैदेखि उक्त नयाँ नोट सर्वसाधारणका लागि बजारमा पठाएको जनाएको छ। पुराना नोटकै आकार, रङ्ग र ढाँचालाई निरन्तरता दिइएको यस नयाँ नोटको संकेत नम्बर टर२४ ०००००१ देखि णर७० ९९९९९९ सम्म रहेको छ।

नयाँ नोटको अघिल्लो भागको मध्य भागमा नेपाल सरकारको जमानत प्राप्त भुक्तानी सम्बन्धी प्रतिज्ञामूलक वाक्यांश राखिएको छ। नोटको बायाँतर्फ सगरमाथाको चित्र र दायाँतर्फ लालीगुराँसको पानी छापका साथै त्यसको मुनि अङ्ग्रेजीमा “NRB” अंकित गरिएको छ।

त्यसैगरी तल्लो खण्डमा सिरिज नम्बर वि.सं. २०८२ र गभर्नर प्रा. डा. विश्वनाथ पौडेलको दस्तखत रहेको छ। नोटमा १.२ मि.मी. चौडा भएको सुरक्षण धागो राखिएको छ, जसलाई प्रकाशतर्फ फर्काएर हेर्दा स्पष्ट रूपमा “NRB” लेखिएको देख्न सकिन्छ।

त्यस्तै नोटको पछिल्लो भागको मध्य खण्डमा हिउँ चितुवाको चित्र र सोको माथि अङ्ग्रेजीमा “NEPAL RASTRA BANK” लेखिएको छ। पृष्ठ भागकै तल्लो खण्डमा अङ्ग्रेजीमा “RUPEES FIFTY” र सिरिज नम्बर “2025 A.D.” उल्लेख गरिएको राष्ट्र बैंकले जनाएको छ।