काठमाडौं । अफगानिस्तानको तालिबान शासनले आइतबार राति पाकिस्तानी सेनाले कुनार र पक्तिका प्रान्तका सर्वसाधारण बसोबास गर्ने क्षेत्रहरूमा बमबारी गरेको दाबी गरेको छ।

तालिबान शासनका प्रवक्ता जबिहुल्लाह मुजाहिदले यस हमलाको जानकारी दिँदै उचित जवाफ दिइने बताएका छन्।

जबिहुल्लाह मुजाहिदले सामाजिक सञ्जाल ‘एक्स’ मा लेखेका छन्, ‘गएको राति पाकिस्तानी सेनाले अफगानिस्तानको कुनार र पक्तिका प्रान्तका आम नागरिकहरू बसोबास गर्ने क्षेत्रहरूमा बमबारी गर्यो।’

‘कुनारमा एक महिला र दुई पुरुषको मृत्यु भएको छ भने दुई महिला र दुई पुरुष घाइते भएका छन्। यी सबै स्थानीय आम नागरिक हुन्। पक्तिकामा एक घर र एक स्थानीय पसलमा बमबारी गरियो, तर कोही हताहत भएको खबर छैन। हामी यस हमला र अत्याचारको निन्दा गर्दछौँ र यसलाई अपराधको पुनरावृत्ति मान्दछौँ।’

उनले अगाडि लेखेका छन्, ‘पाकिस्तानको सैन्य नेतृत्वले आफ्नो देशको आन्तरिक सुरक्षाको असफलताबाट ध्यान मोड्नका लागि पुनः एकपटक यस्तो अपराध गरेको छ। इन्शाअल्लाह! अफगान जनताले यस हमलाको उचित जवाफ दिनेछन्।’

पाकिस्तानका तर्फबाट यस दाबीबारे कुनै आधिकारिक प्रतिक्रिया भने आइसकेको छैन। उल्लेखनीय छ कि यसै वर्षको फेब्रुअरीमा पनि पाकिस्तान र अफगानिस्तानबीच सीमा क्षेत्रमा तनाव र द्वन्द्व देखिएको थियो।