काठमाडौं। हाल नेपालमा पश्चिमी वायु र मनसुनी वायुको संयुक्त आंशिक प्रभाव कायमै रहेको छ। जल तथा मौसम विज्ञान विभागका अनुसार कर्णाली र सुदूरपश्चिम प्रदेशका साथै गण्डकी र लुम्बिनी प्रदेशको पश्चिमी भूभागमा पश्चिमी वायुको प्रभाव रहेको छ भने कोशी, मधेश, बागमती र बाँकी भूभागमा मनसुनी वायु र पश्चिमी वायुको आंशिक प्रभाव परेको छ।

मौसम पूर्वानुमान महाशाखाका अनुसार देशका हिमाली तथा पहाडी भूभागमा हाल आंशिकदेखि साधारणतया बदली रहेको छ भने लुम्बिनी प्रदेशको तराई भूभागमा आंशिक बदली देखिएको छ। तराईका बाँकी भूभागमा भने मौसम मुख्यतया सफा रहेको छ। अहिले कोशी प्रदेशका थोरै स्थानहरूका साथै बागमती र लुम्बिनी प्रदेशका एक-दुई स्थानमा हल्का वर्षा भइरहेको छ।

आज दिउँसो कोशी, बागमती, गण्डकी र लुम्बिनी प्रदेशका साथै कर्णाली र सुदूरपश्चिम प्रदेशका पहाडी भूभागमा साधारणतया बदली रहनेछ। देशका तराई भूभाग र कर्णाली तथा सुदूरपश्चिमका हिमाली भेगमा भने आंशिक बदली रहने अनुमान गरिएको छ। यस क्रममा कोशी, बागमती, गण्डकी र लुम्बिनी प्रदेशका हिमाली र पहाडी भूभागका थोरै स्थानहरूमा मध्यम वर्षा तथा हिमपातको सम्भावना रहेको छ।

साथै, कर्णाली र सुदूरपश्चिमका पहाडी क्षेत्रका थोरै स्थानमा मध्यम वर्षा र हिमाली भूभागका एक-दुई स्थानमा हल्का वर्षा तथा हिमपात हुन सक्नेछ। मधेश प्रदेशसहित कोशी, बागमती, गण्डकी र लुम्बिनी प्रदेशका तराई क्षेत्रका एक-दुई स्थानमा पनि मध्यमसम्मको वर्षाको सम्भावना रहेको छ।

त्यस्तै आज राति कोशी, मधेश, बागमती र गण्डकी प्रदेशका साथै लुम्बिनी, सुदूरपश्चिम र कर्णालीका पहाडी तथा तराई भूभागमा साधारणतया बदली रहनेछ भने कर्णाली, लुम्बिनी र सुदूरपश्चिमका हिमाली भूभागमा आंशिक बदली रहनेछ।

रातिको समयमा कोशी, बागमती र गण्डकी प्रदेशका हिमाली क्षेत्रका एक-दुई स्थानमा हल्का वर्षा र हिमपातको सम्भावना रहेको छ। यसैगरी कोशी, बागमती, गण्डकी र लुम्बिनीका पहाडी भूभागका थोरै स्थानमा मध्यमसम्मको वर्षा हुन सक्नेछ।

तराई क्षेत्रतर्फ मधेश, कोशी, बागमती र गण्डकीका थोरै स्थानहरूमा तथा लुम्बिनी र सुदूरपश्चिमका तराई भूभागका एक-दुई स्थानमा मध्यम वर्षाको सम्भावना रहेको छ। वर्षा र हिमपातका कारण दैनिक जनजीवन, यातायात तथा पर्यटकीय गतिविधिमा आंशिक असर पर्न सक्ने भएकाले आवश्यक सतर्कता अपनाउन महाशाखाले आग्रह गरेको छ।