काठमाडौं। बडादशैं मनाउन तथा विभिन्न कामले काठमाडौँ उपत्यका छाड्ने यात्रुहरूको संख्या चार लाख ९६ हजार नाघेको छ।

काठमाडौं उपत्यका ट्राफिक कार्यालयका प्रवक्ता प्रहरी उपरीक्षक नरेशराज सुवेदीले दिएको जानकारी अनुसार घटस्थापनादेखि यता हालसम्म ७८ हजारभन्दा बढी सार्वजनिक सवारीसाधनले उपत्यका छाडेका छन् भने चार लाख ९६ हजारभन्दा बढी यात्रु बाहिरिएका छन्।

प्रवक्ता सुवेदीले विशेष गरी महाअष्टमीका दिन घर फर्कने यात्रुहरूको चाप निकै बढी देखिएको बताए।

उनका अनुसार निजी सवारीसाधनमार्फत उपत्यका छाड्नेहरूको तथ्यांक भने अझै आइसकेको छैन। महाअष्टमीका दिन बिहानको समयमा उपत्यकाबाट बाहिरिने गाडीहरूको चाप उच्च देखिए पनि दिउँसोदेखि भने क्रमशः कम हुँदै गएको उनले बताए।

उपत्यका छाड्नेहरूको संख्या बढेसँगै हाल यहाँका मुख्य सडकहरूमा सवारीसाधनको चाप ह्वात्तै घटेको छ। सडक सुनसान बन्दै गएको अवस्थामा तीव्र गतिमा सवारी चलाउने, लागुपदार्थ तथा मादक पदार्थ सेवन गरेर (मापसे/लापसे) गाडी चलाउने चालकहरूमाथि ट्राफिक प्रहरीले कडाइ गरेको प्रवक्ता सुवेदीले जानकारी दिएका छन्।