नयाँ दिल्ली। भारतमा कोरोना संक्रमितको संख्या ह्वात्तै बढेको छ। भारतमा अहिलेसम्म कोरोना संक्रमितको संख्या ५ लाख ४९ हजार १९७ पुगेको छ।

तीमध्ये ३ लाख २१ हजार उपचारपछि निको भएका छन् भने २ लाख १० हजार को उपचार भइरहेको छ। संक्रमित बढेसँग उत्तर प्रदेश र मध्य प्रदेश सरकारले घर घरमा गएर कोरोनाको टेस्ट गर्ने निर्णय गरेको छ। अहिलेसम्म दिल्ली, मुम्बईसहित केही अन्य स्थानमा पनि घर घरमा गएर कोरोनाको टेस्ट गरिँदै आएको छ।

पाँच दिनदेखि दैनिक २ लाख भन्दा बढी परीक्षणहरू भइरहेका छन्। भारतमा लगातार पाँच दिनदेखि २ लाख भन्दा बढी टेस्ट भइसकेका छन्। भारतमा हालसम्म कोरोना संक्रमणबाट १६ हजार १ सय ३ जनाको मृत्यु भइसकेको छ।

महाराष्ट्रमा सबैभन्दा बढी ७ हजार २ सय ७३ जनाको मृत्यु भएको छ। तर जनसंख्याको हिसावले सबैभन्दा धेरै मृत्यु राजधानी दिल्लीमा भएको छ। दिल्लीमा प्रति १० लाख जनसंख्यामा १२९ मृत्यु भएको छ।