काठमाडौं । रुसी राष्ट्रपति भ्लादिमिर पुटिनले बिहीबार पश्चिमी राष्ट्रहरूले आफ्नो देशविरुद्ध दशकौंदेखि आक्रामक व्यवहार गरेको आरोप लगाएका छन्। पुटिनले बिहीबार पश्चिमी राष्ट्रहरूलाई चुनौती दिँदै भने कि यदि उनीहरूले रूसलाई हराउन चाहन्छन् भने उनीहरूलाई युद्धको मैदानमा स्वागत छ। पुटिनले पश्चिमी देशहरूले त्यसो गर्दा युक्रेनका लागि त्रासदी ल्याउने बताए ।

समाचार एजेन्सी रोयटर्सका अनुसार भ्लादिमिर पुटिनको पछिल्लो बयान शुक्रबार इन्डोनेसियामा हुने जी-२० विदेश मन्त्रीहरूको बैठक अघि आएको हो। यस बैठकमा रुसी विदेशमन्त्री सर्गेई लाभारोभले आफ्ना जी-२० समकक्षहरूसँग बन्द ढोकामा वार्ता गर्न लागेका छन्।

फेब्रुअरीमा युक्रेनमा भएको आक्रमणपछि रुसका शीर्ष कूटनीतिज्ञले पश्चिमी देशका कूटनीतिज्ञहरूसँग कहिल्यै भेट गरेका छैनन्।

रुसी संसदका नेताहरूलाई टेलिभिजनमा सम्बोधन गर्दै भ्लादिमिर पुटिनले भने, “हामीले धेरै पटक सुनेका छौं कि पश्चिमी देशहरू युक्रेनको अन्तिम व्यक्तिको उद्धार नभएसम्म हामीसँग लड्नेछन्। युक्रेनका जनताका लागि यो दुखद घटना हो, तर अवस्था त्यही दिशातिर गइरहेको देखिन्छ ।”

फेब्रुअरीमा युक्रेनमा हमला भएपछि पश्चिमी देशहरूले रुसमाथि कडा आर्थिक प्रतिबन्ध लगाएका छन् । यसबाट रुस समस्यामा परेको हुनसक्छ तर पश्चिमा राष्ट्रहरु उसको कदम रोक्न असफल भएका छन् । पुटिनले बिहीबार भनेका थिए, ‘पश्चिमी देशहरूले चाहेको जस्तो भएन।’

तर, युक्रेनका मुख्य मध्यस्थकर्ता मिखाइल पोडिल्याकले भ्लादिमिर पुटिनको भनाइलाई अस्वीकार गरेका छन् । उनले पश्चिमा मुलुकको यस्तो ‘सामूहिक योजना’ नभएको बताए ।

यसैबीच युक्रेनको पूर्वी भागमा भिडन्त जारी छ । प्रशासनले खार्किवमा भएको आक्रमणमा तीन जनाको मृत्यु भएको जनाएको छ।