काठमाडौं । सामाजिक सञ्जाल कम्पनी ट्विटरका अध्यक्षले टेस्लाका प्रमुख एलन मस्कको कम्पनीसँगको ४४ अर्ब डलरको सम्झौता पूरा गराउन अदालत जाने बताएका छन् । एलन मस्कले ट्वीटर किन्ने सम्झौताबाट बाहिरिने घोषणा गरेका छन् । उनले यो सम्झौतासँग सम्बन्धित सर्तहरु पटकपटक तोडेको आरोप लगाउँदै आफू पछि हटेको बताएका छन् ।

विश्वका सबैभन्दा धनी व्यक्ति एलन मस्क र ट्वीटरबीच कम्पनी किन्नको लागि अप्रिल महिनादेखि चर्चा चलिरहेको छ, जसमा समय समयमा नयाँ ट्विस्टहरू आइरहेका छन् । पछिल्लो घटनाक्रममा, एलन मस्कले कम्पनीले आफूलाई नक्कली खाताहरूको बारेमा पर्याप्त जानकारी नदिएको आरोप लगाएका छन्।

ट्विटर र मस्क बीचको सम्झौतामा यी नयाँ बाधाहरू आएका समाचारका कारण कम्पनीको सेयर मूल्य ७ प्रतिशत घट्यो। ट्विटर र मस्क बीचको खरिद सम्झौतामा ब्रेक-अप शुल्क एक अर्ब डलर तोकिएको थियो, जसको मतलब यो रकम सम्झौता टुटेको खण्डमा भुक्तानी गर्ने सम्झौता भएको थियो।

एलन मस्कको घोषणापछि ट्वीटरले अब यो सम्झौताका सम्बन्धमा कानुनी कारबाही गर्ने बताएको छ । ट्विटरका अध्यक्ष ब्रेट टेलरले एक ट्वीटमा लेखेका छन्, “ट्विटर बोर्ड मस्कसँग सहमत भएको मूल्य र सर्तमा लेनदेन पूरा गर्न कटिबद्ध छ।

उनको सन्देशबाट अब दुई पक्षबीच लामो अदालती प्रक्रिया सुरु हुन सक्ने बुझिएको छ ।

एलन मस्कले ट्विटर किन्नको लागि अप्रिलमा एउटा सम्झौतामा हस्ताक्षर गरेका थिए। तर अर्को महिनामा, उनले नक्कली र स्प्याम खाताहरूको संख्यामा ट्विटर तथ्याङ्कहरू पर्खिरहेकाले सम्झौता “अस्थायी रूपमा होल्डमा” रहेको बताए।

मस्कले ट्विटरमा कुल खाताहरूमध्ये नक्कली वा स्प्याम खाताहरूको संख्या ५ प्रतिशतभन्दा कम भएको प्रमाण मागेका थिए। अब उनका वकिलले युएस सेक्युरिटीज एण्ड एक्सचेन्ज कमिसनलाई पत्र लेख्दै ट्वीटरले या त जानकारी दिन असफल भएको वा जानकारी नदिइरहेको बताएका छन् ।

पत्रमा भनिएको छ, “ट्विटरले कहिलेकाहीं मस्कको अनुरोधलाई बेवास्ता गरेको छ, कहिलेकाहीं नाजायज जस्तो देखिने कारणहरू देखाउँदै जानकारी दिन अस्वीकार गरेको छ र कहिलेकाहीँ अनुरोधहरू स्वीकार गरेको दाबी गरेको छ जब कि उसले मस्कलाई या त अपूर्ण जानकारी दिएको छ वा यस्तो जानकारी दिएको छ जुन कुनै कामको छैन।”

स्प्याम खाताहरू धेरै संख्यामा मानिसहरूलाई जानकारी फैलाउन वा मानिसहरूलाई बहकाउन सिर्जना गरिएका खाताहरू हुन्। ट्विटरले बिहीबार भनेको छ कि उसले हरेक दिन ट्वीटरबाट करिब १० लाख नक्कली खाताहरू हटाउँदैछ। एलन मस्क विश्वास गर्छन् कि२० प्रतिशत वा बढी ट्विटर खाताहरू नक्कली छन्।