काठमाडौं । पूर्व भारतीय कप्तान विराट कोहली यतिबेला आफ्नो खराब फर्मबाट गुज्रिरहेका छन्। उनी लगभग हरेक खेलमा रन बनाउन संघर्ष गरिरहेको देखिन्छ । कोहलीले पछिल्लो साढे दुई वर्षदेखि अन्तर्राष्ट्रिय क्रिकेटका तीनवटै फर्म्याट (टेष्ट, ओडीआई, टी–२०) मा शतक बनाउन सकेका छैनन् ।

यो खराब प्रदर्शनका कारण फ्यानहरु पनि निराश छन् । यससँगै अब कोहलीलाई टिमबाट बाहिर निकाल्ने वा थप मौका दिने चर्चा चलिरहेको छ । कोही मौका दिने पक्षमा छन् भने कोही सिधै उनले आफुलाई प्रमाणित गर्नुपर्ने कुरा गर्छन् ।

यसैबीच, भारतीय क्रिकेट कन्ट्रोल बोर्ड (बीसीसीआई) का एक शीर्ष अधिकारीको कोहलीबारे महत्त्वपूर्ण बयान बाहिर आएको छ। छनोट सधैं प्रदर्शनका आधारमा हुने उनको भनाइ छ । यसमा विराट कोहली वा अरु खेलाडी जो कोहीलाई पनि बाहिर निकाल्न सकिने उनले बताए ।

बीसीसीआईका एक शीर्ष अधिकारीले भने, ‘हेर्नुहोस्, विराट कोहली जस्ता खेलाडीहरू देशको सेवा गर्नका लागि बनाइएका हुन्। विराटले विगत १० वर्षमा जे गरे त्यो अचम्मको छ । उनी सबै फर्म्याटमा टिम इन्डियाको कप्तान भइसकेका छन् । विशेषगरी कोहलीले सेतो बल र रातो बलको क्रिकेटमा उत्कृष्ट प्रदर्शन गरेका छन् । तर सबै खेलाडीहरू कुनै न कुनै बिन्दुमा खराब चरणहरू मार्फत जान्छन्। विराटको अवस्था पनि त्यस्तै छ । मलाई लाग्छ उसले पुनरागमन गर्नेछन्।’

छनोटको समयमा एकदिवसीय र टी-२० विश्वकपमा कोहलीको प्रदर्शनको समीक्षा हुने हो कि ? भनेर सोध्दा अधिकारीले भने, “हेर्नुहोस्, कोहलीले कप्तान र खेलाडीको रूपमा देशको लागि असाधारण रूपमा राम्रो प्रदर्शन गरेका छन्। हो तर अहिले कोहली रन बनाउन संघर्ष गरिरहेका छन्, तर मलाई लाग्दैन कि उनलाई छाड्नु पर्छ। हामी उनले सकेसम्म धेरै क्रिकेट खेलुन् भन्ने चाहन्छौं ताकि उनले आफ्नो लय पाउन सकून्।’

“यद्यपि, म यो पनि भन्न चाहन्छु कि यदि प्रदर्शनको आधारमा छनोटको कुरा आउँछ भने, जो कोहीलाई पनि टोलीबाट हटाउन सकिन्छ, चाहे त्यो विराट कोहली होस् वा अरू कोही। इंग्ल्याण्ड भ्रमणपछि अझै धेरै सिरिज खेल्न बाँकी छ । जहाँ कोहलीलाई ट्रायल गर्न सकिन्छ।’

उनले भने, ‘विशेषगरी एसिया कपमा, जुन टी–२० विश्वकप अघि हुन लागेको छ । त्यसपछि चयनकर्ताहरूले निर्णय गर्नेछन्। हामीसँग टी–२० विश्वकप आउन अझै धेरै समय छ । उनी एक प्रमुख खेलाडी हुन् र यसमा कुनै गडबड हुनु हुँदैन। यो समयको मात्र कुरा हो। सबै कुरा उठाउनु हुँदैन।

विराट कोहलीले पछिल्लो साढे दुई वर्षदेखि अन्तर्राष्ट्रिय क्रिकेटका तीनवटै फर्म्याट (टेष्ट, ओडीआई, टी–२०) मा शतक बनाएका छैनन् । उनले नोभेम्बर २०१९ मा बंगलादेशविरुद्धको डे–नाइट टेस्टमा अन्तिम शतक बनाएका थिए ।

त्यसपछि कोहलीले कोलकातामा भएको टेस्टमा १३६ रनको इनिङ खेलेका थिए । भर्खरै न्यूजिल्याण्ड विरुद्धको एजब्यास्टन टेस्टमा कोहलीले ३१ (११+२०) मात्रै रन बनाएका थिए ।