काठमाडौं। नेपाल क्रिकेट संघ (क्यान) ले टी–२० विश्वकप क्रिकेट खेलेका खेलाडी र मुख्य प्रशिक्षकलाई जनही ३ लाख दिने भएको छ।

क्यानको आज बसेको केन्द्रीय कार्यसमितीको बैठकले अमेरिका र वेष्ट इन्डिजमा भएको टी–२० विश्वकप खेलेका खेलाडी र प्रशिक्षकलाई जनही ३ लाख दिने निर्णय गरेको हो। यस्तै अन्य सपोर्ट स्टाफलाई जनही १ लाख ५० हजारका दरले प्रोत्साहन भत्ता दिने निर्णय क्यानले गरेको छ।

क्यानले प्रदेशका खेलाडीहरुलाई पनि मासिक तलब दिने भएको छ। ७ वटै प्रदेश क्रिकेट संघलाई २ जना महिला र ३ जना पुरुष खेलाडीहरुलाई सेप्टेम्बर १ देखि लागु हुने गरी १ वर्षसम्म जनही मासिक १५ हजार पारिश्रमिक उपलब्ध गराउने निर्णय बैठकले गरेको हो।

खेलाडीहरुको पारिश्रमिक बापतको रकम प्रदेशहरुमा पठाइनेछ र प्रदेश क्रिकेट संघले खेलाडीहरुलाई सम्झौता गर्ने क्यानले जनाएको छ। यस्तै आगामी नोभेम्बर डिसेम्बरमा हुने नेपाल प्रिमियर लिगमा ८ फ्रेन्चाइजी टीमहरुको सहभागिता हुने भएको छ।

क्यानले लेखबहादुर क्षेत्रीको संयोजकत्वमा युनिल श्रेष्ठ र मुर्तुजा हवारी सदस्य रहने गरी ३ सदस्यीय राष्ट्रिय छनौट समिति गठन गरेको छ भने आदिल आलमको निलम्बन फुकुवा प्रकृयाबारे आवश्यक कागजात आईसीसी एन्टी करप्सन युनिटमा पेश गरी आईसीसीबाट प्राप्त निर्देशन अनुसार संघबाट निर्णय गर्ने जनाएको छ।